Саха сирин 5 бырайыага Уһук Илиҥҥэ тупсаҕай эйгэни тэрийии куонкуруһун бастакы түһүмэҕин ааста

Бүгүн, муус устар 28 күнүгэр, Магадаҥҥа Уһук Илин субъектарын куораттарыгар тупсаҕай эйгэни тэрийии бырайыактарын куонкуруһун бастакы түһүмэҕин түмүгэ билиннэ. Саха сириттэн биэс бырайыак 32 бастыҥ үлэ иһигэр киирдэ. Ол туһунан Ил Дархан Айсен Николаев бэйэтин телеграм-ханаалыгар иһитиннэрдэ. 

Ол курдук:

• Ленскэй куорат. “Орджоникидзе уулуссанан сатыы киһи сылдьар сирин сайыннарыы» – 50 мөл. солкуобай.
• Бороҕон сэлиэнньэтэ. “Н.Н.Окоемов аатынан кытылы тупсаҕай оҥоруу» – 50 мөл. солкуобай.
• Жатай бөһүөлэгэ. “Шамшин аатынан бульвары тупсаҕай оҥоруу” – 50 мөл. солкуобай.
• Бэрдьигэстээх сэлиэнньэтэ. “Кыайыы болуоссатын тупсаҕай оҥоруу» – 50 мөл. солкуобай.
• Үөһээ Бүлүү. “И.Н.Барахов аатынан сквери тупсаҕай оҥоруу”  — 100 мөл. солкуобай.

«Кыайыылаахтары ис сүрэхпиттэн эҕэрдэлиибин! Бу ыытыллыбыт үлэ көхтөөх, талааннаах дьон үлэтин түмүгэ. Онон бу ылбыт үптэрин-харчыларын көмөтүнэн өрөспүүбүлүкэҕэ киһи сылдьарыгар уонна сынньанарыгар табыгастаах миэстэ элбиэҕэ. Истиҥ эҕэрдэбин тутуҥ! Маладьыастар», — диэн Айсен Николаев бэлиэтээтэ.