Саха сирин 50 олохтооҕор “Үлэ киһитэ” бириэмийэни туттарыахтара

Ил Дархан 300 тыһыынча суумалаах  “Үлэ киһитэ” бириэмийэтин өрөспүүбүлүкэ сайдыытыгар биллэр кылаатын киллэрбит 50 бастыҥ үлэһиккэ Саас уонна Үлэ бырааһынньыгын көрсө туттарыахтара.

Өрөспүүбүлүкэ тэрилтэлэрин кэлэктииптэрэ Ил Дархан бириэмийэтин куонкуруһугар кыттарга барыта  315 сайаапканы министиэристибэлэргэ уонна биэдэмэстибэлэргэ ыыттылар. Олортон тустаах ирдэбилгэ эппиэттиир 107 сайаапканы таллылар. Талыллыбыт сайаапкалары өрөспүүбүлүкэ бырабыыталыстыбатын иһинэн хамыыһыйа көрүөҕэ, ол түмүгүнэн 50 лауреат быһаарыллыаҕа.

Куонкурус сүрүн ирдэбиллэрэ:

-отчуоттуур сыл түмүгүнэн үлэҕэ-хамнаска үрдүк көрдөрүүлэр;

-үлэҕэ саҥа идеялары олоххо киллэрии;

-үлэ үөрүйэҕэ эбэтэр  исписэлиистэр таһымнарын үрдэтиигэ настаабынньык быһыытынан үлэ.

Санатан эттэххэ, Ил Дархан бириэмийэтигэр куонкурус быйыл үсүһүн ыытыллар. Икки сыл устатыгар 100 бастыҥ үлэһит “Үлэ киһитэ” бириэмийэнэн наҕараадаланна.