Саха сирин аграрийдара Арассыыйа Дьоруойа Андрей Григорьевка пиэрмэни тэрийиигэ көмө оҥордулар

Арассыыйа Дьоруойа Андрей Григорьевы СӨ Тыатын хаһаайыстыбатын министиэристибэтигэр чиэстээтилэр.

Тута урут тыа хаһаайыстыбатын кэпэрэтиибигэр үлэлээбит. Саха сирин аграрийдара Андрей Григорьевка пиэрмэ тэринэригэр көмөлөһүөн баҕалаахтарын биллэрдилэр. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.

Күүтүүлээх көрсүһүү тыа хаһаайыстыбатын миниистирэ Артем Александров бааһынай хаһаайыстыбалар уонна тыа хаһаайыстыбатын кэпэрэтииптэрин ассоциациятын чилиэннэрин кытта ыыппыт мунньаҕын чэрчитинэн буолла. Артем Александров Андрей Григорьевы Арассыыйа Дьоруойун үрдүк аатынан эҕэрдэлээтэ уонна туруоруллубут соруктары толорууга хорсунун, тулуурдаах буолуутун иһин махталын биллэрдэ.

«Бүгүн биһиги, тыа хаһаайыстыбатын үлэһиттэрэ, дойдубут историятыгар үйэ-саас тухары суруллар боростуой уолун эҕэрдэлиибит. Байыаннай дьайыыга барыар диэри Андрей төрөөбүт Ньурба оройуонугар «Сиибиктэ» тыа хаһаайыстыбатын кэпэрэтиибигэр тырахтарыыһынан үлэлээбитэ. Бу да сырыыга аграрийдар сөптөөх сатабыллаах буолалларыгар уонна саамай уустук балаһыанньаттан тахсар суолу-ииһи булалларыгар өссө төгүл итэҕэйдибит. Ити барыта — олоҕун уопута уонна сатабыла, төрөөбүт дойдутугар ытыктабыла, таптала биһиги дьоруойбутугар көмөлөспүтэ дии саныыбын», — диэтэ миниистир уонна «Саха сүөһүтэ» тэрилтэттэн биэни ыларга сэртипикээт туттарда.

Бастатан туран, Андрей Григорьев Арассыыйа Дьоруойа улахан чиэс, эппиэтинэс буоларын уонна манныкка кини өссө да үөрэммэтэҕин бэлиэтээтэ. Дьоруой ону сэргэ бойобуой зонаҕа байыастарга өрүү көмөлөһөрүн, өйүүрүн туһунан кэпсээтэ.

«Кылаабынайа дьиэҕэр күүтэр дьонун өйөбүллэрэ, тапталлара буолар. Ити барыта байыастары күүһү уонна сэргэхситиини биэрэр, ону тэҥэ байыастарга гуманитарнай көмө оҥоһуллара олус көмөлөһөр», — диэтэ кини. «Инники былааммар пиэрмэни тэрийии буолар. Дэриэбинэҕэ улааппытым, онон бу үлэни билэбин», — диэн кини санаатын үллэһиннэ.

Пиэрмэр хаһаайыстыбатын тэрийэригэр икки төбө сүөһүнү, ону тэҥэ саха боруодалаах сылгыны бэлэхтээтилэр. Ол курдук, Ньурба улууһун пиэрмэрдэрин Ассоциацията — Л.В. Иванова (КФХ «Сиибиктэ»), Д.М. Васильева (КФХ “Өлөннөөх”), В.Д. Филиппова (СКПК «Силис»), А.А. Степанова ( СХПК “Бысыттах”), А.Д. Федотова (КФХ “Аккай”), С.С.Федорова (СПК “Жархан”), А.Г. Кириллина (СХКОПК “Кюндядя”), А.А. Константинова (СХЖПК “Антоновка”) үс ыанар ынаҕы уонна сэттэ ньирэйи биэрдилэр. Ону тэҥэ Томпо оройуонун Кириэс-Халдьаайы сэлиэнньэтиттэн төрүттээх Охлопковтар дьиэ кэргэттэрэ саҥа пиэрмэри өйөөн уон ньирэйи бэлэх ууннулар. Андрей Григорьев пиэрмэрдэргэ уонна биир дойдулаахтарыгар истиҥник махтанна.