Хаартыска: А.Рудых
“Анаабыр алмаастара” хампаанньа алмааһы хостуур бириискэлэригэр сүүһүнэн киһи үлэлиир. Манна үлэ икки симиэнэнэн күнүстэри-түүннэри күөстүү оргуйар. Онон хампаанньа хас биирдии киһитин туруу үлэһитинэн ааттыахха сөп.
Ол гынан баран, бүгүн “Анаабыр алмаастарыгар” (АЛРОСА дочернай хампаанньата) өр сылларга үлэлиир уонна баахта олохторун укулаатынан буолбут үлэһиттэри билиһиннэриэхпит.
Владислав Михайлов “Молодо” бириискэҕэ тимир ууһунан үлэлиир. Бириискэҕэ чахчы тимири уһанар дьиэ уонна тимир ууһа бааллар! Мэҥэ Хаҥалас улууһун Майа сэлиэнньэтиттэн төрүттээх Владислав Дьокуускай куоракка олорор.
— Мин үлэм пуруона – дэтээллэри илиинэн таптайыы, хатарыы уонна оҥоруу, — диир Владислав Николаевич. – Холобур, туокардар угулуктары чочуйаллар, онтон мин хатарабын. Луомнары, монтажкалары, кубаалдалары уо.д.а. хаһан таһаарабын. Сайын үлэлииргэ, биллэн турар, итии. Анал таҥастаах үлэлиир төһө да итиитин иһин, үөрэнэн хаалаҕын. Ол оннугар кыһын үчүгэй – мэлдьи сылааска сылдьаҕын. Төһө да 64-с хаарбар үктэннэрбин, доруобуйам этэҥҥэ курдук, доруобуйаны бэрэбиэркэлиир хамыыһыйаны ааһабын.
Хампаанньаҕа 15-с сылбын үлэлиибин, мин баахтаҕа кырата түөрт ый устата сылдьабын. Дьокуускайга кэлэн сынньанабын, онтон эмиэ бириискэ ыҥыра турар, кыыспын уонна сиэннэрбин өйөөн харчы өлөрүөххэ эмиэ наада.
Сергей Карп “Майаат” бириискэ “Талахтаах” учаастагар машинист-бульдозериһынан үлэлиир. Кини Уус Маайа улууһугар көмүһү хостооччулар Ыныкчаан бөһүөлэктэригэр төрөөбүтэ. Кини эһээтэ уонна төрөппүттэрэ артыалга үлэлээбиттэрэ, оттон Сергей аармыйаҕа сулууспалаан баран, бэйэтэ көмүһү хостооһуҥҥа кэлбитэ.
— Көмүһү хостооһуҥҥа 5 сыл үлэлээн баран, 2000 сыллар саҕаланыыларыгар “Анаабыр алмаастара” диэн саҥа хампаанньаҕа эдэр исписэлиистэри сүүмэрдииллэрин истибитим. Онон мин биэс сыллаах уопуппун учуоттаан, үлэҕэ ылбыттара, — диэн Сергей Карп кэпсиир. – Быраабыла курдук, күнүскү симиэнэ сарсыарда 8 чаастан киэһэ 8 чааска диэри (эбиэккэ тохтобуллаах) үлэлиир. Душтаах, тэлэбиисэрдээх уонна холодильниктаах богуон-балкаларга олоробут. Иллээхпит-эйэлээхпит, уочаратынан хомуйабыт, сууйабыт-сотобут.
Бириискэҕэ сарсыардааҥҥы, күнүскү уонна киэһээҥҥи аһылык араспысаанньанан туруктаахтык бэриллэр. Остолобуойга миини, эт арааһыттан иккис бүлүүдэни, араас салааттары хайаан да биэрэллэр. Ону таһынан эбии аһылык: бичиэнньэ, кэмпиэт, сгущенка уо.д.а. биэрэн ыыталлар.
Ити курдук, хайыы үйэ 23 сыл “Анаабыр алмаастара” хампаанньа бириискэлэригэр бульдозериһынан үлэлиибин.
Манна 25 саастаах эдэр киһи кэлбитим уонна, арааһа, кырыйдахпына барарым буолуо дии саныыбын. Билигин уочараттаах баахтабар сылдьан баран, Костромаҕа дьиэ кэргэммэр көтөөрү сылдьабын.
«Баахтаҕа биирдэ сырыттаххына, үөрэнэн хаалаҕын!»
— Хампаанньаҕа 2012 сылтан үлэлиибин, — диэн Уус Алдан улууһун Бороҕонуттан сылдьар уот силиэсэрэ Петр Пермяков кэпсиир. — Манна кэлбиппин хара маҥнайгыттан сөбүлээбитим, киһилии сыһыан, дьоһуннаах хамнас, интэриэһинэй өрүттээх үлэ – барыта баар. Манна кэлиэхпэр диэри идэбинэн араас сиргэ үлэлээбитим. Ол гынан баран, “Анаабыр алмаастарыгар” үлэ усулуобуйатын курдук үчүгэй усулуобуйа ханна да суоҕа.
“Молодо” бириискэҕэ тупсаҕай оҥоһуулаах уопсай дьиэлэр, остолобуой, бибилэтиэкэлээх, остуол теннистээх уонна бильярдаах сынньанар киин бааллар. Ардыгар бириискэҕэ саха эстрадатын артыыстара кэлэн кэнсиэртииллэр.
Биһиги силиэсэрдэрбит бары дэгиттэр дьоҕурдаахтар. Биһиги тэриллэри, салгын лииньийэлэрин уонна уоту кытары сибээстээҕи барытын өрөмүөннүөхпүтүн сөп. Мин баахтаҕа түөрт ыйтан итэҕэһэ суох кэмҥэ үлэлиибин, онтон уоппускаҕа барабын. Дьиэ кэргэним баахтаҕа үлэлиирбин өйүүр, өйдүүр.
Мин АЛРОСА “Идэҕэ бастыҥ” корпоративнай күрэхтэһиилэригэр үстэ кыттыбытым. Былырыын үһүс миэстэни ылбыппынан киэн туттабын. Өрөспүүбүлүкэ үлэһит ыччатыгар бэйэлэрин күүстэрин уонна билиилэрин “Анаабыр алмаастара” хампаанньа эбийиэктэригэр тургутан көрөллөрүгэр сүбэлиибин. Баахтаҕа биирдэ сырыттаххытына, салгыы үөрэнэн хаалаҕыт.
Алексей РУДЫХ суруйуутуттан тылбаас
Бэрэбиэркэ хамнаһы, уоппусканы уонна бүтэһиктээх төлөбүрү төлүүргэ хойутатыы тахсыбытын, үлэ харыстабылын салайар систиэмэни оҥоруу уонна…
Алдан оройуонун Аллараа Кураанах бөһүөлэгин баһылыга Александр Усенко байыаннай дьайыы кыттыылааҕын аҕатын Хикмет Искандеровы кытта…
Полиция Дьокуускай олохтооҕор иирсээн кэмигэр бииргэ олорор дьахтарын төлөпүөнүн алдьаппытын иһин холуобунай дьыаланы тэрийдэ. ИДьМ…
Уус Алдан улууһун дьаһалтата, тэрилтэ салайааччылара байыаннай дьайыы кыттыылаахтарын, төрөппүттэрин, дьиэ кэргэттэрин кытта көрсүбүттэр. …
Ааспыт өрөбүллэргэ Дьокуускай куоракка 7 суол быһылаана тахсан, 3 киһи араас эчэйиини ылбытын туһунан Госавтоиниспиэксийэ…
Сунтаар улууһугар ааспыт сылга норуот ырыаһыта, олоҥхоһут, сыанаҕа үҥкүү култууратын төрүттээччи Сергей Зверев-Кыыл Уола төрөөбүтэ…