Саха сирин алмаастара – Өлөөнтөн Аллараа Бэстээххэ диэри
Геолог күнүн иннинэ “ТайгаПост” суруналыыстара Бүлүүтээҕи геология-чинчийэр эспэдииссийэттэн Саха сирин киин өттө алмааһы хостооһун флагманынан буолуон сөбүн дуу, суоҕун дуу, “Интернациональнай” туруупка дэҥҥэ көстөр уратытын уонна геологтар ыттарын тоҕо көҥүл ыыппаттарын ыйыталастылар.
Аан дойдуга алмааһы хостооһун 30% АЛРОСА-ҕа тиксэр. Геологтар отчуоттарыттан көрдөххө, маннык балаһыанньа инникитин да баар буолуоҕа. Арассыыйа алмаастарын сырьевой саппааһа 4,5 миллиард кэриҥэ караатынан сыаналанар, ити аан дойду баазатын аҥаарыттан элбэҕин ылар. АЛРОСА алмааһын 78 % Саха сиригэр хостонор.
Саамай баай “Интернациональнай” туруупканы Мииринэй-Ньурба хайа байытар кэмбинээт хостуур, бэлэмниир. АЛРОСА исписэлиистэрэ хостоммут боруода хас биирдии кубометрыттан мөлүйүөн аҥаара солкуобайдаах алмааһы ылаллар! “Майскай” диэн саамай саҥа хостонор баайдаах сири Накыыҥҥа булбуттара. Оттон саамай үлэни эрэйэр алмааһы Удачнайдааҕы хайа-байытар кэмбинээт Үөһээ Муунатааҕы сиригэр хостууллар: урууданы салгыы байытарга 170 килэмиэтирдээх сиргэ тиэйэргэ күһэллэллэр.
АЛРОСА алын тэрилтэтэ “Анаабыр алмаастара” хампаанньа үлэтэ эмиэ сонун уратылардаах. Манна алмаас бытархай боруодатын чочуйар киэҥ сиргэ “фантазийнай” кырааскалаах араас таастары булаллар. Кинилэри үөскэтээччилэр – кимберлит эттиктэр ханна сыталлара билиҥҥитэ биллибэт. Геологтар ону көрдүү сылдьан көмүскэ кэтиллэ түспүттэрэ.
Хампаанньа өссө биир алын тэрилтэтэ – Архангельскай уобаласка үлэлиир “Севералмаз” эмиэ “киһиргиирдээх”. Бу тэрилтэ үлэлиир М.В. Ло-
моносов аатынан баайдаах сир уратыта – алта туруупкаттан турар аан дойдуга соҕотох хостуур сир. Бу баайдаах сир ураты сырьелаах, олохтоох алмаастар быһыылара-таһаалара, өҥнөрө араастар.
Манна даҕатан эттэххэ, Саха сирин арҕаа өттүгэр алмааһы бырамыысыланнай хостооһун 1957 сылтан ыытыллар.
Уһун кэм түһүмэхтэрэ
Геология-чинчийэр үлэлэргэ киин начаалынньыга Кирилл Скрябин 2010 сыллаахха Хотугулуу-Илиҥҥи федеральнай университеты бүтэрбитэ. Хаҥалас улууһуттан төрүттээх эдэр киһи үс сыл Өймөкөөҥҥө көмүһү көрдөөбүтэ, онтон Мииринэйгэ үлэлии көспүтэ. Кирилл Скрябин холобура – АЛРОСА-ҕа карьераны оҥостуохха сөбүн бигэргэтэр элбэх холобуртан биирдэстэрэ.
Кирилл Скрябин:
– Илин-Сибииргэ сытар Саха сирин арҕаа өттүн дэхси сирэ-уота барыта алмаас төрүт уонна бытархай баайдаах сирдэринэн кэскиллээх. Геология-чинчийэр үлэлэри ыытарга кэскиллээх сирдэринэн Мииринэй, Сунтаар, Ньурба, Өлөөн, Анаабыр, Алдан, Эдьигээн, Булуҥ улуустара буолаллар.
Холобур, Өлөөн, Анаабыр уонна Булуҥ улуустарыгар алмаас биллэр-көстөр бытархай боруодата элбэх, ол гынан баран, алмаас төрүт сирдэрэ билиҥҥитэ булулла иликтэр. Алмаас хостонор сирдэрэ көнө ньуурга да, Лаптевтар муораларыгар да баар буолуохтарын сөп. Геология чинчийиилэрэ уустуктарын уонна уһун кэми эрэйэллэрин өйдүөххэ наада. Заполярьеҕа геологтар үлэлэрэ наһаа ыраах, ыарахан айаннаах сир буоларынан уустуктардаах. Биһиги Өлөөн улууһугар барыс биэрэр алмаастаах сирдэр аһыллыахтара диэн билиҥҥитэ этэр кыахпыт суох.
– Түмүк хаһан биллиэн сөбүй?
– Хостооһун технологиялара уонна аан дойду ырыынагын конъюнктурата уларыйаллар. Билигин барыһы биэрбэт бытархай боруодалар сотору кэминэн интэриэһиргэтэн туруохтарын сөп. Ол эрээри, ол олох хойут буолуон сөп. Бастатан туран, геология-чинчийэр үлэлэри ыытар туһунан быһаарыы ылыллыан наада. Ол кэнниттэн айылҕа харыстабылын өрөспүүбүлүкэтээҕи уорганнарын, төрүт олохтоохтору кытары сөбүлэһиилэр, уопсастыбаннай истиилэр ыытыллаллар.
– Геология-чинчийэр үлэлэр түһүмэхтэригэр экологияҕа орооһуу туһунан эттэххинэ?
– АЛРОСА баайдаах сирдэри хостооһуҥҥа эрэ буолбакка, айылҕа харыстабылын сокуонун тутуһууга аан дойдуга инники иһэр. Үлэлэр бары сокуон ирдэбиллэрин учуоттаан бырайыактаналлар. Биһиэхэ бааза лааҕырдарыгар бэл ыттары көҥүл күүлэйдэппэттэр.
Кирилл Скрябин кэпсээбитинэн, геология-чинчийэр үлэлэр сэттэ түһүмэхтээх үс кэрдиискэ арахсаллар. Икки бастакы кэрдиискэ минерагеническай, эрэгийиэннээҕи көрдүүр үлэлэр уонна баайдаах сирдэри көрдөөһүн киирэллэр. Геологическай устуу уонна беспилотниктар көмөлөрүнэн геология каарталара оҥоһуллаллар. Онтон түмүктэр үчүгэй буоллахтарына, геологтар аныгыскы түһүмэххэ – сири-уоту уһун кэмнээх ымпыктаан-чымпыктаан көрдөөһүҥҥэ киирэллэр. Уопут көрдөрөрүнэн, маннык үлэлэр 5-10 сыл устатыгар ыытыллаллар. Салгыы төһө туһалааҕыттан көрөн, сыаналыыр уонна чинчийэр үлэлэр бараллар. Түмүк эмиэ ситиһиилээх буоллаҕына, баайдаах сир саппаастара судаарыстыба балансатыгар ылыллаллар. Ол курдук, геология-чинчийэр үлэлэр табылыннахтарына, өссө 10-20 сыл наада. Санатан эттэххэ, 1954 сыллаахха булуллубут саамай бастакы “Зарница” туруупканы хостооһуну 1998 сылтан эрэ саҕалаабыттара.
Статистика көрдөрөрүнэн, 100 булуллубут туруупкаттан биирэ эрэ хостонор сиринэн буолуон сөп. АЛРОСА геологтара этэллэринэн, билигин Саха сирин баайын бэрт кыра эрэ чааһа үөрэтилиннэ (Сибиири барытын туһунан эппэккэ туран), онон ханнык баҕарар арыйыылар баар буолуохтарын сөп. Сир-уот, уруккутун курдук, элбэх кистэлэҥнээх. Геологтар ахсаабат үлэлэрин көмөтүнэн, Саха сирин бүддьүөтүн оҥорор сүрүн тэрилтэ кэлэр 30-тан тахса сылга үлэтэ мэктиэлэнэр. Оттон геология-чинчийэр үлэлэр хайыы үйэ баар чахчыларынан, АЛРОСА үйэ аҥаарынан да инникилээҕэ көстөр.
Тайгапост суруйуутуттан тылбаас
Сообщить об опечатке
Текст, который будет отправлен нашим редакторам: