Саха сирин алта үөрэнээччитэ физкултуураҕа Бүтүн Арассыыйатааҕы үөрэнээччилэр олимпиадаларын түмүктүүр түһүмэҕэр миэстэлэстэ

Бу күннэргэ Дьокуускайга Бүтүн Арассыыйатааҕы үөрэнээччилэр олимпиадаларын түмүктүүр түһүмэҕэ буолан ааста. Арассыыйа 81 эрэгийиэниттэн 292 оҕо мустан ким кыахтааҕын, киэҥ билиилээҕин тургутта. Саха сириттэн аҕыс оҕо кыттыбытыттан үс оҕо бастаата, үс оҕо миэстэлэстэ.

Бүгүн олимпиаданы түмүктүүр дьоро тэрээһин “Сэргэлээх уоттара” култуура киинигэр буолла. СӨ Бырабыыталыстыбатын бэрэссэдээтэлэ Кирилл Бычков: “Киэҥ-нэлэмэн Арассыыйа 81 эрэгийиэниттэн 292 оҕо кытынна, 135 оҕо кыайда, миэстэлэстэ. Бу саалаҕа олорор, олимпиада түмүктүүр түһүмэҕэр кэлбиттэр номнуо кыайыылаахтаргыт.

Арассыыйа үгүс чөмпүйүөннэри, дьоруйдары, успуорт, физкултуура диэйэтэллэрин иитэн таһаарда. Бу дьиҥнээх номох буолбут дьону солбуйааччылар эһиги буолаҕыт.

Манна, биһиги өрөспүүбүлүкэбитигэр, саамай тулуурдах, дьулуурдаах норуот олорор сиригэр бу тэрээһин ыытыллыбытынан бэлиэ. Эһиги күүскүтүн, кыаххытын, тулуургутун көрдөрдүгүт. Эҕэрдэлиибин!” – диэн эттэ.

Физкултуураҕа, успуорка үтүөлэрин, социальнай-экэнэмиичэскэй сайдыыга кылааттарын уонна үгүс сыллаах, үтүө суобастаах үлэлэрин иһин СӨ Бырабыыталыстыбатын кыраамататынан физкултуура биридимиэтигэр Бүтүн Арассыыйатааҕы үөрэнээччилэр олимпиадаларын дьүүллүүр сүбэтин бэрэссэдээтэлэ, Москватааҕы физическэй култуура судаарыстыбаннай академиятын ректора Николай Чесноков, СӨ Бырабыыталыстыбатын махтал суругунан Дьокуускай куораттааҕы национальнай гимназия физкултуураҕа учуутала Татьяна Крылова наҕараадаланнылар.

Николай Чесноков, бастатан туран, Ил Дархаҥҥа, Бырабыыталыстыбаҕа, Үөрэх уонна билим министиэристибэтигэр, Саха сирин норуотугар уонна ордук чорботон волонтердарга махталын биллэрдэ. “Манна, Саха сиригэр 81 эрэгийиэнтэн кэлбиттэрэ олус үчүгэй. Чахчы тулуурдаах, дьаныардаах дьон ханна олорорун биллигит. Уһун айаны, бириэмэ араастаһыытын аахсыбакка, олимпиаданы биир тыынынан аастыгыт. Биир эрэ күн ааспытын кэриэтэ” – диэн бэлиэтээтэ.

Кыайыылаахтар:

1. Ирина Фёдорова, Дьокуускай куорат 17-с нүөмэрдээх оскуолатын 11-с кылааһын үөрэнээччитэ
2. Юлия Ганяк, Нерюнгри куорат 1-кы нүөмэрдээх оскуолатын 10-с кылааһын үөрэнээччитэ
3. Любовь Гавриленко, Нерюнгри куорат 24-с нүөмэрдээх информационнай-технологическай лиссиэйин 9-с кылааһын үөрэнээччитэ.

Миэстэлэспиттэр:

1. Полина Гоманова, Дьокуускай куорат 31-с нүөмэрдээх оскуолатын 9-с кылааһын үөрэнээччитэ
2. Софрон Скрябин, Дьокуускай куораттааҕы национальнай гимназия 10-с кылааһын үөрэнээччитэ.
3. Арина Пуляевская, Дьокуускай куорат 33-с нүөмэрдээх оскуолатын 10-с кылааһын үөрэнээччитэ.