Саха сирин анимациятын федеральнай премьерата буолла

“Арассыыйа” быыстапка-пуорумугар  Саха сирин киинэтин уонна анимациятын бэстибээлэ буолла. Онон НХСБ оҕолорго аналлаах түөрт анимация бырайыагын уонна икки аатырбыт киинэни көрдөрдүлэр.

Wink (“Мир цифры”)  киинэ-тыйаатырын-лекторийыгар “Туундара” устуудьуйа “Тымныы оҕуһа” лиэнтэтин билистилэр. Бу киинэ Startup Village 2023 уонна  Торонтоҕа imagineNATIVE Film and Media Arts Festival киинэ бэстибээлигэр кыттыбыта.

Киэһэ Wink-кэ “Рядовой Чээрин”киинэни көрдөрдүлэр (YouTube 2 сылга 16 млн көрүү). Бу киинэ топ-15 иһигэр киирэр.

“Миигиттэн саха киинэтэ туох уратылааҕый диэн куруук ыйыталлар. Онуоха мин хоруйдуубун: Саха сиригэр кыһыҥҥы уһун киэһэлэргэ ханна да таһырдьа тахса сатаабаккын. Ол иһин биһиэхэ маннык элбэх айтишник, сценарист, режиссер баар”, — диэтэ хартыына режиссера Дмитрий Кольцов.

Бэстибээлгэ Любовь Борисова “Мин үрдүбэр күн киирбэт”  киинэтин көрүү буолла. Бу лиэнтэ араас бэстибээллэргэ 22 бирииһи ылбыта, ол иһигэр Москватааҕы норуоттар икки ардыларынааҕы киинэ бэстибээлэ (ММКФ), Шанхайдааҕы киинэ бэстибээлэ,  FIPRESCI бирииһэ, БРИКС-2021 киинэ бэстибээлин гран-притэ.

Өскөтүн 2021 сылга саха киинэлэрэ дойду киинэ тыйаатырдарыгар 60 мөл солк. хомуйбут буоллахтарына, 2022 сылга – 73,5 мөл., онтон 2023 сыл уон ыйыгар  – 88 мөл солкуобайы.

Быйыл Wink  Степан Бурнашев уонна Дмитрий Давыдов “ЭТ” саҥа киинэ альманаҕын сопродюсерынан буолбута. Саха сиригэр дьиҥнээх киинэни оҥороллор диир Wink видеосервиһын контеҥҥа дириэктэрэ Александр Косарим.

Эрэгийиэн былаастара 30 сыл устата олохтоох киинэни өйүүллэр, 2022 сылга өйүүр сокуон ылыллыбыта. 2023 сыл саҕаланыыта Киинэ индустриятын концепцията бигэргэммитэ.

РФ Бэрэсидьиэнин сорудаҕынан Дьокуускайга элбэх өҥөнү оҥорор киинэ павильонун тутуу буолар. Бырайыак өрөспүүбүлүкэҕэ креативнай индустрияны хааччыйыахтаах. 2027 сылга үлэҕэ киириэхтээх.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата