Саха сирин артыыстара Донецкай өрөспүүбүлүкэҕэ кэнсиэрдээтилэр

Донецкай норуодунай өрөспүүбүлүкэ Еленовка бөһүөлэгэр Култуура дьиэтин үөрүүлээх аһыллыыта буолла. Манна Саха сирин артыыстара кыттыыны ыллылар. Кинилэр бу өрөспүүбүлүкэҕэ өссө хаста даҕаны кэнсиэрдиир былааннаахтар диэн СӨ култуураҕа уонна духуобунай сайдыыга миниистирэ Афанасий Ноев телеграм-ханаалыгар иһитиннэрдэ.

Сыанаҕа Мииринэйдээҕи тыйаатыр кэллэктиибэ уонна СӨ Эстрада судаарыстыбаннай тыйаатырын артыыһа Байтыкаан Батаакап ыллаатылар. Кинилэр бырааһынньыктааҕы кэнсиэргэ кытыннылар.

«Еленовкаҕа Култуура дьиэтин аһыллыыта уонна Саха сирин артыыстарын гостуруола Арассыыйа саҥа эрэгийиэннэригэр күннээҕи олоҕу чөлгө түһэриигэ хардыы буолар», — диэн миниистир суруйар.