Саха сирин артыыстара Хабаровскай кыраайга кэнсиэрдээтилэр

Бэҕэһээ, алтынньы 19 күнүгэр, саха артыыстара Хабаровскай кыраайга уопсай байыаннай полигоҥҥа кэнсиэртээтилэр. Бу Илиҥҥи байыаннай чаастарынан гостуруоллуур бырагыраама бастакы пууна. Салгыы артыыстары Биробиджаҥҥа, Уссурийскайга уонна Сергеевка дэриэбинэтигэр, Владивостокка күүтэллэр.

Саха сирин араас муннуктарыттан дойдуларын көмүскүү кэлбит эр дьон артыыстар хас биирдии нүөмэрдэрин болҕомтолоохтук көрдүлэр. Кэнсиэри сахалар эрэ буолбакка, нуучча сулууспалааччылара эмиэ бэркэ сэҥээрэн көрбүттэр. «Биһиги манна омугунан арахсыбаппыт, бары биирбит», — диэн полигоҥҥа этэллэр. Ону сэргэ бу күн ыраастаныы сиэрэ-туома, алгыс тыла этиллибит. Саха эстрадатын артыыстара бэлиэтииллэринэн, кэнсиэртиир чэпчэкитэ суохтук бэриллэр эбит.

«Иккис кэнсиэрбитин син чэпчэкитик көрдөрдүбүт. Байыаннай эпэрээссийэҕэ барар биир дойдулаахтарбыт сэриигэ баралларын билэр буоламмыт, кинилэргэ кэнсиэртиир бастаан наһаа уустук этэ. Ол да буоллар кыратык эмэтик санааларын көтөхтүбүт быһыылаах диэн санааҕа кэллибит», — диир Анастасия Готовцева. Кэнсиэр бүтүүтэ биир дойдулаахтар бары тоҥолохтон тутуһан оһуокайдаатылар.