Саха сирин авиациятын 100 сылынан АЛРОСА наҕараадалары туттарда

Саха сирин авиациятын 100 сылынан АЛРОСА наҕараадалары туттарда

17.10.2025, 09:56
Хаартыска: АЛРОСА
Бөлөххө киир:

1925 сыл алтынньы 8 күнүгэр Саха сирин күөх халлааныгар бастакы сөмөлүөт – номоххо киирбит “Сопвич” биплан көтөн тахсыбыта, ити күнтэн улуу эпоха саҕаламмыта.

Авиация хайыы үйэ биир үйэ устата өрөспүүбүлүкэ олоҕор-дьаһаҕар дьоһун суолталаах. Үгүс түгэҥҥэ чуолаан авиация ыраах сытар уонна уустук суоллаах-иистээх сирдэри кытары ситимниир соҕотох сириэстибэнэн буолар. Саха сиригэр үбүлүөйдээх сылынан үөрүүлээх тэрээһиннэр ыытылыннылар, “АЛРОСА авиахампаанньа” уонна АЛРОСА Мииринэйдээҕи авиационнай тэрилтэтин бэрэстэбиитэллэрэ наҕараадаланнылар.
Өрөспүүбүлүкэ авиацията Уһук Хотугу сир тыйыс усулуобуйатыгар үлэлээбит хас да көлүөнэ пилоттары уонна инженердэри иитэн таһааран, сайдыы уустук суолун ааспыта. Авиация эрэгийиэн, ордук Саха сирин арҕаа өттүн, бырамыысыланнаһын баһылыырга күүстээх көҕүлээччинэн буолан, тиэхиньиичэскэй сайдыы бэлиэтинэн билиниллибитэ.
Мииринэйгэ авиация устуоруйата 1971 сылтан саҕаламмыта. Кэлэктииптэр ааспыт уон сылларга улуус олохтоохторугар уонна алмааһы хостуур бырамыысыланнаска тырааныспар табыгастаах буоларын хааччыйан, сүҥкэн үлэни ыыттылар. Билигин Мииринэй аэропорда Саха сирин арҕаа өттүн сүрүн салгын тэрилтэтинэн, оттон “АЛРОСА авиахампаанньа” дойдуга барытыгар уонунан хайысхаҕа көтөр эрэгийиэн биир бастыҥ тэрилтэтинэн буолар.
Саха сирин авиациятын 100 сылыгар аналлаах үбүлүөйдээх тэрээһиннэр чэрчилэринэн, салгын тырааныспарын салаатыгар өҥөтүн уонна өрөспүүбүлүкэ социальнай-экэнэмиичэскэй сайдыытыгар кылаатын иһин, Ил Дархан Махталынан “АЛРОСА” хампаанньа Мииринэйдээҕи авиационнай тэрилтэтэ наҕараадаланна.


«Биһиги кэлэктииппит сүрүн соруга – салгынынан көтүүлэргэ куттал суох буолуутун уонна көтөөччүлэргэ усулуобуйаны хааччыйыы буолар. Саха сирин баһылыгын махтала – тэрилтэ хас биирдии үлэһитин өҥөтүн билинии”, — диэн Мииринэйдээҕи авиационнай тэрилтэ хамандыыра Валерьян Веретенников бэлиэтээн эттэ. Өр сыллаах бэриниилээх уонна үтүө суобастаах үлэтин иһин СӨ Ил Дарханын Грамотатынан “АЛРОСА” хампаанньа (ПАО) бэтэрээнэ, Мииринэйдээҕи авиационнай тэрилтэ ГСМ сулууспатын кыладапсыыга Елена Алексеевна Цинкуш наҕараадаланна.
Ону таһынан наҕараадалары “АЛРОСА авиахампаанньа” үлэһиттэрэ туттулар.

Ан-24, Ан-26 салгын суудунатын хамандыыра Сергей Михайлович Ивахнов “СӨ тырааныспарын үтүөлээх үлэһитин” аатын ылла. Сергей Ивахнов 1991 сылтан Мииринэйдээҕи авиационнай тэрилтэҕэ Ан-2 сөмөлүөт иккис пилотунан үлэлээбитэ. 2010 сыллаахха Ан-24 уонна Ан-26 сөмөлүөттэр хамандыырдарынан буолбута. Оттон 2013 сылтан инструктор быһыытынан ииппит-такайбыт эдэр исписэлиистэрин улахан аҥаардара авиахампаанньаҕа ситиһиилээхтик үлэлииллэр.


“АЛРОСА авиахампаанньа” АУо хайысхаҕа салайааччыта Андрей Александрович Гулов “Саха Өрөспүүбүлүкэтин тырааныспарын үтүөлээх үлэһитэ” буолла. Кини Мииринэйдээҕи авиационнай тэрилтэҕэ үлэтин 1987 сылтан Ан-2 сөмөлүөт иккис пилотунан саҕалаабыта. 1991 сыллаахха Ан-24, Ан-26 хамандыырдарынан анаммыта уонна Ил-76 туһаныыны биир бастакынан баһылаабыта. Андрей Александрович авиатордар эдэр көлүөнэлэрин иитиигэ уонна алмаас бырамыысыланнаһын эбийиэктэрин салгынынан хааччыйыыга улахан кылаатын киллэрбитэ. Кини 2013-2014 сылларга “АЛРОСА авиахампаанньа” АУо генеральнай дириэктэринэн үлэлээбитэ, Саха сирин арҕаа өттүгэр авиация уонна каадыр саппааһын тиһиктээх сайдыытын хааччыйбыта.
«Авиация өрөспүүбүлүкэ социальнай-экэнэмиичэскэй сайдыытыгар олус улахан суолталаах. “АЛРОСА авиахампаанньа” Саха сирин арҕааҥҥы улуустарын ситимниир сүрүн звенонан буолар. Биһиги Саха сирин бырабыыталыстыбатын уонна АЛРОСА хампаанньа соруктарын толорон, дьону таһыыга өрөспүүбүлүкэҕэ иккис миэстэҕэ бигэтик сылдьабыт. Ону таһынан араас таһаҕаһы, холобур, ас-үөл бородууктатын, нэһилиэнньэ наадыйар табаардарын, алмаастаах сирдэри чинчийиигэ уонна туһаныыга наадалаах тэриллэри, тиэйэбит-таһабыт. Авиация хайа-байытар бырамыысыланнаска алмааһы хостооһуҥҥа саппаас частары кэмигэр аҕаларга көмөлөһөр”, — диэн Андрей Гулов кэпсээтэ.

Мииринэйгэ – саҥа тиэхиньикэ уонна саҥа аэропорт

«АЛРОСА авиахампаанньа» салгын пааркатын саҥардыы тосхолун олоххо киллэрэр.
«Биһиги кэнники биэс сылга Казаннааҕы авиация собуотуттан 5 саҥа бөртөлүөтү ыллыбыт. Уон сыл иһигэр өссө уону ылар былааннаахпыт. Ону сэргэ паарканы Ил-114, “Ладога” уонна МС-21 тииптээх Арассыыйа аныгы сөмөлүөттэринэн уларытыы бырагырааматын үөрэтэбит”, — диэн “АЛРОСА авиа-хампаанньа” генеральнай дириэктэрэ Игорь Хороших иһитиннэрдэ.
Билигин Мииринэйгэ тутулла турар аэропорт саҥа комплекса 2026-2027 сылларга үлэҕэ киллэриллэрэ сабаҕаланар. Комплекс аһыллыытыгар Мииринэй олохтоохторо уонна АЛРОСА үлэһиттэрэ саҥа аэропорду алмаас салаатын номоҕо – “Якуталмаз” трест бастакы управляющайа Виктор Тихонов аатын иҥэриини көҕүлээтилэр.
Мииринэйдээҕи авиа-тэрилтэ уонна “АЛРОСА авиахампаанньа” Мииринэйгэ аэропорт саҥа комплексыгар көһөргө бэлэмнэнэллэр, алмаастаах кыраай авиатордарын бастыҥ үгэстэрин салгыыллар уонна Саха сирин авиациятын устуоруйатыгар бэйэлэрин кылааттарын киллэрэллэринэн киэн тутталлар.

БЫҺААРЫЫ:

Мииринэйдээҕи авиатэрилтэ 1971 сыллаахха гражданскай авиация Саха сиринээҕи управлениетын састаабыгар киирэн, Мииринэйдээҕи холбоһуктаах авиаэтэрээт быһыытынан тэриллибитэ. 1990-с сыллар саҥаларыгар Мииринэйдээҕи авиационнай тэрилтэҕэ (МАП) уларыйбыта, онтон 2013 сыллаахха тэрилтэ састаабыттан тахсан, “АЛРОСА авиахампаанньа” диэн туспа тэрилтэ буолбута.

Бары сонуннар
Салгыы
18 октября
  • -10°C
  • Ощущается: -16°Влажность: 85% Скорость ветра: 3 м/с

Сообщить об опечатке

Текст, который будет отправлен нашим редакторам: