Саха сирин баһылыгын дуоһунаһыгар хандьыдааттар дебаттара: үөрэхтээһин эйгэтин сайдыыта

Өрөспүүбүлүкэҕэ үөрэхтээһин сайдыытын эйгэтин туһунан кэпсэтиигэ  Айсен Николаев, Гаврил Парахин уонна Виктор Губарев кытыннылар.

Хандьыдааттар Саха сиригэр үүнэр көлүөнэ хаачыстыбалаах үөрэҕи ыларыгар кинилэр тугу этиэхтэрин сөбүн ыйыттылар.

Айсен Николаев ханна олороллоруттан тутулуга суох, хаачыстыбалаах үөрэҕи ылар үчүгэй усулуобуйалаах буолуохтаахтар диэн эттэ. Ол курдук, ааспыт биэс сыл  иһигэр олус элбэх үөрэх тэрилтэтэ: 75 оҕо уһуйаана уонна 51 оскуола киирбитин бэлиэтээтэ. Сыл бүтүөр диэри өссө 16 саҥа оскуола уонна алта оҕо тэрилтэтэ киириэхтээх. Айсен Николаев бэйэтин бырагырааматыгар үрдүк үөрэх тэрилтэлэригэр бүддьүөт миэстэтин улаатыннарарга, педагогическай үлэһиттэри бэлэмнииргэ хаачыстыбаҕа, эдэр учууталлар хамнастарын үрдэтиигэ, миэстэтигэр дьиэ-уот боппуруоһун быһаарарга болҕомтотун ууруоҕун эттэ.

Гаврил Парахин Уһук Илин, ол иһигэр Саха сирин олохтоохторугар БКЭ суох оҥорорго этии киллэрдэ. Ону таһынан кини Саха сирин үрдүк үөрэҕин тэрилтэлэригэр босхо үөрэҕи ситиһэр былааннааҕын эттэ.

Виктор Губарев үөрэх тиһигин судаарыстыбаннай бырагырааматын олоххо киллэрэр туһунан баҕа санаалааҕын эттэ. Оччоҕо БКЭ туттарыытын формата уларыйыан, оскуолаҕа оробуочай идэлэри ылар кыахтара үөскүөн сөбүн быһаарда.