Саха сирин байыаһа алта саллааты быыһаабытын туһунан кэпсээтэ

Мииринэй оройуонугар байыаннай дьайыыттан үс саллаат уоппускатыгар кэллэ. Бу туһунан Мииринэй оройуонун дьаһалтатын телеграм-ханаалыгар иһитиннэрэллэр.

Нюргун Таас-Үрэхтэн сылдьар, кэргэннээх, оҕолоох. Байыаннай дьайыыга барыан иннинэ «Айхалтрансгаз» тэрилтэҕэ үлэлээбит. Оттон Зорикто уонна Иван «Вилюй» управлениетыгар суоппардаабыттар. Зорик бу ый тохсунньутугар байыаннай дьайыыга барбыт. Кини Угледар анныгар баар чааска штурмовой ротаҕа сылдьыбыт. Өстөөҕу кытта киирсиигэ пулеметтаах снайпер үлэлээн, ыарахан балаһыанньа буола сылдьыбытын кэпсээтэ. Кини кэргэннээх, икки оҕолоох.

Иван байыаннай дьайыыга былырыын сэтинньи 4 күнүгэр барбыта. Соҕуруулуу-донецкайдыы хайысхаҕа сылдьыбыт.  Байыаннай дьайыы хонуутуттан саллааттары эвакуациялыыр. Биирдэ кини алта байыаһы буулдьа быыһынан таһаарбытын туһунан кэпсээтэ. Хата, барыта этэҥҥэ ааһан, уолаттары госпиталга тиксэрбит.

Байыастары улуус дьаһалтатыгар Александр Басыров уонна Павел Шелехов көрүстүлэр, саха быһахтарын бэлэхтээтилэр.