«Саха сирин балыга» дьаарбаҥка саҕаланна

Дьокуускайга Хомсомуол болуоссатыгар «Саха сирин балыга» дьаарбаҥка үлэтин саҕалаата. Саҥа дьыл бу буолаары турдаҕына, дьон бырааһынньыктааҕы остуолугар сибиэһэй балыгы ууруохтарын баҕарар буолан, тоҕуоруһа муһунна. Атыы-эргиэн хамаҕатык бара турар. Дьаарбаҥка ахсынньы 20-22 күннэригэр ыытыллыаҕа.

Дьаарбаҥкаҕа Булуҥ, Абый, Аллараа Халыма, Усуйаана улуустарыттан балыгынан дьарыктанар урбаанньыттар, тыа хаһаайыстыбатын кэпэрэтииптэрэ, барыта 17 тэрилтэ кыттар диэн Тыа хаһаайыстыбатын министиэристибэтэ иһитиннэрэр.

Маны тэҥэ, Мэҥэ Хаҥаластан, Чурапчыттан эт, ис аҕалан атыылыахтара.

Ханнык бырааһынньык сандалыта тоҥ балыга суох буолуой? Манна быйыл муус аннынан бултаммыт, кыһыллар тоҥ балыктар, тууһаммыт, ыыһаммыт күндү балыктар, собо, сордоҥ, күндүөбэй, тоҥоруллубут  бэлэм бүлүүдэлэр, маны тэҥэ, ынах, сылгы, таба сибиэһэй этэ, иһэ, ынах арыыта атыыланыаҕа. Олохтоох бородууксуйаны хаһаана илик дьон өрөбүллэри көтүппэккэ кэлэн, удамыр сыанаҕа атыылаһа охсуҥ.

Дьаарбаҥка үс күн устата, сарсыарда 10 чаастан киэһэ 5 чааска диэри таһырдьа буолуоҕа. Тэрийээччи — «Якутские продукты» тыа хаһаайыстыбатын потребительскэй кэпэрэтиибэ.