“Саха сирин балыга” дьаарбаҥка ыҥырар

Бу нэдиэлэҕэ СӨ Тыатын хаһаайыстыбатын уонна ас-үөл бэлиитикэтин министиэристибэтэ “Саха сирин балыга” өрөспүүбүлүкэтээҕи уон бэһис дьаарбаҥканы тэрийэр.

Онон Дьокуускайга Комсомол болуоссатыгар алтынньы 24 күнүттэн 26 күнүгэр диэри 11 балык хаһаайыстыбата уонна астыыр-үөллүүр тэрилтэлэр атыылыахтара. Ол курдук, Булуҥ, Дьааҥы, Аллараа Халыма, Үөһээ Халыма уо.д.а. улуустарыттан уонна Дьокуускай к. кэлэн кыттыахтара.

Куорат олохтоохторугар Саҥа дьыллааҕы хаһаастарын да оҥостоллоругар бэрт буолсу.

Дьаарбаҥка кэмигэр балыктыыр бастыҥ хаһаайыстыбалары наҕараадалыахтара. “Чукча” хоту дойду аныгы ресторана “Индигирка” салааты хайдах бэлэмнииргэ маастар-кылааһы көрдөрүөҕэ. “Гулун” норуодунай ансаамбыл эҕэрдэлиэҕэ.

Онон хоту дойду балыксыттарын өйөөн, атыылаһыҥ, дьаарбаҥкаҕа кэлэн сылдьыҥ.