Хаартысканы Тускулаана ГОРОХОВА-КОБЕЛЬЯНОВА тиксэрдэ
Тохсунньу 23 күнүгэр Дьокуускайга «Арассыыйа — мин устуоруйам» историческай пааркаҕа «Оҕо саас сирдьиттэригэр» диэн үс күннээх оскуола үлэлээтэ. Ол иитинэн Саха сирин бастыҥ дириэктэри иитэр үлэҕэ сүбэһит күрэһэ тэрилиннэ.
2022 сыллаахха Арассыыйа 45 регионун оскуолаларыгар дириэктэри иитэр үлэҕэ сүбэһит диэн эбии үлэ миэстэтэ кɵрүллүбүтэ. Мантан саҕалаан оҕону иитиигэ, дойдуһа киһи буола улаатарыгар ɵссɵ улахан болҕомто ууруллар уонна үлүскэн үлэ барар.
«Навигаторы детства» киин салайааччыта Ньургуйаана Макарова: «Бу күрэс сыалынан дириэктэри иитэр үлэҕэ сүбэһиттэр статустарын үрдэтии уонна бастыҥ үлэлээх сүбэһиттэртэн уопут ылыы буолар», — диэтэ.
Аан бастакытын тэриллэр «Сыл бастыҥ сүбэһитэ» күрэскэ 62 киһиттэн эрдэ хас да сүүмэрдээһини ааспыт бастыҥ алта сүбэһит кытынна. Кыргыттар оҕолору, тɵрɵппүттэри, общественнай түмсүүлэри кытта үлэлиир кэскиллээх барыллаахтар, үлэлэригэр элбэх ситиһиилээхтэр.
Күрэс үс түһүмэхтээх буолла, бэйэни билиһиннэрии, «Планка успеха» диэн ааттаах үлэ, уонна аһаҕас уруок.
Кыайыылааҕынан Сунтаар политехническэй лиссиэйин сүбэһитэ Айта Гуринова буолла. Кини бэйэтин билиһиннэрэригэр Сунтаар хамаандата бары кɵхтɵɵхтүк кыттыыны ылан, сүбэһит күннээҕи олоҕун чаҕылхайдык арыйдылар, туох сыаллаах үлэлиирин арылхайдык кɵрдɵрдүлэр. «Планка успеха» түһүмэххэ Сунтаартан анаан тиийэн «Оһуор үҥкүүтүн ɵрɵ тутуох» диэн С.А.Зверев — Кыыл Уолун 125 сыллаах үбүлүɵйүгэр аналлаах аахсыйа ыҥырыыбытын кɵмүскээтибит, бэл диэтэр «Оһуор үҥкүүтүттэн» саҕыллан тахсыбыт Тоҕус оһуордаах хамнаныыны бар дьоҥҥо кɵҕүлээн алгыһы ылынныбыт. Онтон үһүс түһүмэххэ Айта «Сɵбүлүүр дьарык» диэн аһаҕас уруогу олус айымньылаахтык ыытта, манна кэргэнинээн Игнат Федоровтыын оҥорбут «Байанай» оонньууларын олус бэркэ оонньоттон, тэрээһин дьонун сэргэхситтилэр.
Күрэс үс күннээх Оҕо саас сирдьиттэрин үɵрэхтээһинин кэмигэр ыытылынна. Сунтаартан 9 киһи кэлэн кытынна. Аһаҕас кэпсэтиигэ улуустартан элбэх этиилэр ылылыннылар, ол онно биһиги хамаандабыт этиитэ Сибиэрэп 125 сылыгар туһуланна.
Сунтаар улууһун Оҕо саас сирдьиттэрин куратора Вера Саввинова: «Муус устар 9 — Сибиэрэп күнүн бүтүн өрөспүүбүлүкэ таһымыгар кɵҕүлээн ыытыахха диэн этии оҥорбуппутун тэрийэр сүбэ ылынан, бу күн Саха сирин бары муннугар Кыыл Уолун аата ааттаныаҕа!».
Бастыҥ сүбэһит — оҕо аймах доҕоро, кэмигэр уһуйааччыта, сүрүнэ олоххо сирдьитэ.
Тускулаана ГОРОХОВА-КОБЕЛЬЯНОВА, ДЬОКУУСКАЙ
Бу күннэргэ Өлүөнэ Эбэҕэ үлэ саамай суолталаах уонна көдьүүстээх көрүҥэ –мууһу эрбээһин уонна хараардыы ыытылла…
Бу күннэргэ күн-дьыл туруга хайдаҕый? Күнү-дьылы кэтээн көрөөччүлэр туох дииллэрий? Өрөспүүбүлүкэ арҕаа өттүгэр, күнүс соҕуруу…
Чукотка автономнай уокуругар Баимскайдааҕы хайа байытар кэмбинээтин тутуу саҕаланна. Баимскайдааҕы ГОК тутуутун хаамыытын РФ Бырабыыталыстыбатын…
Күн оройо буола оҕуста. Сотору кэминэн улахан оҕолоро оскуолаттан кэлиэхтэрэ. Аҕалара эбиэттии кэлиэ. Бэйи эрэ,…
Ил Дархан Айсен Николаев Аҕа дойду Улуу сэриитин кыттыылааҕар Николай Иванович Афанасьевка "Саха Өрөспүүбүлүкэтин бочуоттаах…
Улуу Кыайыы өрөгөйдөөх күнүгэр Ийэ дойдуларын көҥүлүн күөннэринэн хаххалаан көмүскээбит, итии хааннарын тохпут буойун суруналыыстар…