Саха сирин бэрэстэбиитэллэрэ – “Мин дойдум – мин Арассыыйам” куонкурус эспиэрдэрин хамаандатыгар

“Мин дойдум – мин Арассыыйам” Бүтүн Арассыыйатааҕы куонкуруска “Арассыыйа – кыах дойдута” Бэрэсидьиэн платформатын биир сүрүн бырайыага – эспиэрдэр сайабылыанньаларын ылыы хампаанньата түмүктэннэ.

Куонкуруска кыттарга Арассыыйа 86 эргийиэниттэн уопсайа 3116 киһи сайаапка биэрбит. Бырайыакка кыттарга Саха сириттэн үс сайабылыанньа киирбит.

Араас хайысхалаах эспиэрдэр үгэс быһыытынан биир соруктаахтар: Арассыыйа эрэгийиэннэрин социальнай-экэнэмиичэскэй сайдыытыгар сабыдыаллыыр кыахтаах эдэр көҕүлээһиннэри өйөөһүн. Быйыл бырайыак хамаандатыгар социальнай дизайҥҥа, педагогикаҕа, ыччаты кытта үлэҕэ уонна куонкурус атын тематическай хайысхаларыгар уопуттаах идэтийбит дьон киирдилэр. Хас биирдиилэрэ бэйэлэрин холобурдарынан эдэр салайааччыларга үүнэллэригэр, суолталаах толкуйдары олоххо киллэрэллэригэр көмөлөһөллөр.

“Мин дойдум – мин Арассыыйам” куонкурус “Ыччат уонна оҕо” национальнай бырайыак “Арассыыйа – кыах дойдута” федеральнай бырайыагы олоххо киллэрии чэрчитинэн ыытыллар. Куонкуруска Арассыыйа бары эрэгийиэннэрин олохтоохторо кыттар кыахтаахтар. Бу туһунан сиһилии уонна регистрация туһунан бырайыак официальнай саайтыгар moyastrana.ru. билсиэххэ сөп.