Саха сирин бибилэтиэкэтэ тыл эгэлгэтин харыстааһыҥҥа Бүтүн Арассыыйатааҕы бириэмийэҕэ тигистэ

И.Н. Егоров – Горнай аатынан хараҕынан мөлтөхтүк көрөр уонна көрбөттөргө аналлaах өрөспүүбүлүкэтээҕи анал бибилэтиэкэ «Брайль рельефнэй-туочуканан шрифтэринэн саха тылын учуобунньуктарын таһаарыы» бырайыага РФ тыл эгэлгэтин харыстааһыҥҥa «Сүрүн тыл» Бүтүн Арассыыйатааҕы уопсастыбаннай бириэмийэ «Бастыҥ социальнай көҕүлээһин» номинациятыгар кыайыылаах буолла.

Бибилэтиэкэ кэлэктиибин кыайыытынан СӨ Ил Дархана Айсен Николаев эҕэрдэлээтэ. «Брайль шрифтэринэн саха тылын учуобунньуктарын таһаарар бибилэтиэкэ бырайыага – ураты үөрэххэ наадыйар оҕолорго тэҥ бырааптаах усулуобуйаны тэрийиигə улахан хардыы. Бу көҕүлээһин төрөөбүт тылы уонна култуураны харыстыырга, ону таһынан өрөспүүбүлүкэҕэ инклюзивнай үөрэхтээһини өйүүргэ сүҥкэн суолталаах. Бүгүн Саха сиригэр тыллары харыстыыр уонна сайыннарар туһугар киэҥ далааһыннаах, систиэмэлээх үлэ ыытыллар. Үөрэхтээһини, медианы, кинигэни таһаарыыны, сыыппара технологияларын хабар араас көҕүлээһиннэр уонна бырайыактар олоххо киирэллэр. Хараҕынан көрбөттөргө аналлаах бибилэтиэкэ үлэтин курдук бырайыактар федеральнай таһымҥа биһирэбиллэрин ылбыта – биһиги сөптөөх хайысханан баран иһэрбитин өссө төгүл бигэргэтэр. Маладьыастар!» – диэн кини МАХ ханаалыгар суруйар.

Бириэмийэ лауреаттарын наҕараадалыыр үөрүүлээх сиэр-туом Москваҕа буолла уонна «РФ тыл бэлиитикэтэ» IX пуорум чэрчитинэн ыытылынна. Куонкурус 8 номинациянан ыытылынна: «Бастыҥ сыыппара бырайыактара: мобильнай сыһыарыылар, тылбаастааччылар, көмпүүтэргэ аналлаах бырагыраамалар», «Бастыҥ издательскай бырайыак», «Бастыҥ научнай бырайыак», «Бастыҥ социальнай көҕүлээһин», «Төрүт аҕыйах ахсааннаaх норуоттар тылларын харыстааһын иһин», «Ураты өҥөлөрүн иһин», «Арассыыйа Федерациятын норуоттарын тылларын харыстыыр эйгэҕэ бастыҥ блог», «Социальнай эппиэтинэстээх биисинэс» анал номинация.

Куонкуруска 2024 уонна 2025 сылларга олоххо киирбит бырайыактар кытыннылар. Сыала-соруга – Арассыыйа Федерациятын тылын эгэлгэтин харыстыырга уонна сайыннарарга туһуламмыт суолталаах уопсастыбаннай уонна идэлээх көҕүлээһиннэри өйөөһүн, бастыҥ бырайыактары уонна быраактыкалары көҕүлээн, аптарытыаттарын үрдэтии. Бириэмийэни тэрийээччи – Национальностар дьыалаларыгар федеральнай  ааҕыныстыба өйөбүлүнэн «Арассыыйа норуоттарын дьиэтэ».