Саха сирин биир кырдьаҕас оскуолата саҥа дьиэҕэ көстө

Балаҕан ыйын 2 күнүгэр Билии күнүн бырааһынньыгар Кэбээйи улууһун Мукучу нэһилиэгэр саҥа оскуола аһыллыыта буолла. Өрөгөйдөөх быһыыга-майгыга педагогтары уонна үөрэнээччилэри Ил Дархан Айсен Николаев эҕэрдэлээтэ диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.

Саҥа икки этээстээх оскуола уопсай иэнэ 4 тыһыынчаттан тахса кв.м., 275 миэстэлээх. Манна орто оскуола, гимназия, оҕо айымньытын дьиэтэ көһөн киириэхтэрэ. Онон үс эбийиэги холбообут кыһа буоларын быһыытынан, биирдиилээн биридимиэттэри дириҥэтэн үөрэтэр оскуола диэн ааттанна.

“Мукучу оскуолата – өрөспүүбүлүкэ олус баай устуоруйалаах кырдьаҕас оскуолаларыттан биирдэстэрэ. Сэбиэскэй кэмҥэ манна дойдубут араас муннуктарыттан эдэркээн учууталлар үлэлии кэлбиттэрэ. Бу оскуолаттан Социалистическай Үлэ Дьоруойа Михаил Спиридонов  уонна да атын үтүөлээх дьон үөрэнэн тахсыбыттара. Кинилэр ситиһиилэрэ күн бүгүн нэһилиэк олохтоохторун, үүнэр көлүөнэни саҥа кыайыыларга сирдииллэр. Үөрэнээччилэр үөрэххэ, успуорка ситиһиилэрэ элбэҕэ ону туоһулуур. Маннык бэртээхэй оскуола киирбитинэн, кинилэр ситиһиилэрэ өссө үрдүүрүгэр, биһигини үөрдэ туралларыгар эрэнэбин”, – диэтэ Ил Дархан.

Эбийиэк тутуута 2016 сылтан саҕаламмыта, ол эрээри сотору кэминэн тохтотуллубута. Тутууну хаттаан 2021 сыллаахха “Үөрэхтээһин” национальнай бырайыак чэрчитинэн сөргүппүттэрэ.

“Ыраах сытар нэһилиэктэргэ оскуола хайдах курдук наадалааҕын билэбит. Мукучу оскуолата уһуннук тутуллубута, харгыс элбэх этэ, ол эрээри дойдубут Бэрэсидьиэнэ Владимир Путин көҕүлээбит “Үөрэхтээһин” национальнай бырайыагын көмөтүнэн 4000 кв м. иэннээх үөрэх кыһата тутулунна. Манна дьиэ тутуллубутуттан эрэ буолбакка, дьоһуннаах үөрэх эйгэтэ баар буолбутуттан киһи үөрэр. Оскуолаҕа оҕо дэгиттэр сайдарыгар туох барыта баар – аныгы тээбириннээх киэҥ-куоҥ кылаастар, успуорт саалата, бибилэтиэкэ, о.д.а.”, – диэн бэлиэтээтэ Ил Дархан.

Хааччыллыытынан уонна тиэхиньиичэскэй оборудованиетынан оскуола өрөспүүбүлүкэ инники күөҥҥэ турар оскуолаларын кэккэтигэр киирдэ. Кэбиниэттэргэ интерактивнай панеллар турбуттар, компьютернай кылаас, роботиэхиньикэ кылааһа, лабаратыарыйалар, “Үлэ” биридимиэтин ыытар мастарыскыайдар, икки лингафоннай кэбиниэт, успуорт уонна аактабай саалалар, мэдиссиинискэй кэбиниэт, бибилэтиэкэ, остолобуой бааллар. Салгыы оскуола таһыгар успуорт былаһааккатын уонна тэпилииссэни оҥорор былааннаахтар.

Мукучу оскуолата ааспыт үйэ 30-с сылларыгар төрүттэммитэ. Бүгүн кини оскуола сайдыытыгар үтүмэн өҥөлөөх, уһулуччулаах педагог Иван Егорович Левин аатын сүгэр. Билигин манна 180 оҕо үөрэнэр, ол онтон 15 оҕо саҥа оскуолаҕа үөрэнэ киирдилэр.

Үөрэх кыһата агропрофилированнай хайысхалаах итиэннэ “Арассыыйа агрооскуолалара” Ассоциация чилиэнэ буолар. Кэлиҥҥи сылларга, төһө да үчүгэй усулуобуйата суох буоллар, хаста да өрөспүүбүлүкэ гранын ылары ситиспитэ, ол иһигэр 2022 сыллаахха Ил Дархан гранын ылбыта.

Оскуола өрөспүүбүлүкэтээхҕи инновационнай былаһаакка статустаах. Манна “Точка роста” цифровой уонна гуманитарнай хайысхалаах Үөрэх киинэ,  цифровой үөрэтэр эйгэлээх кэбиниэт, оскуола биисиниэс-инкубатора үлэлииллэр. Бу барыта үтүө түмүктээх: ааспыт үөрэх дьылын 24 үөрэнээччи туйгун сыаналаах, түөрт выпускник туйгун үөрэхтэрин иһин кыһыл уонна үрүҥ көмүс мэтээллээх бүтэрбиттэр.