Саха сирин биир саамай улахан оскуолатыгар Михаил Николаев аатын иҥэрдилэр

Дьокуускайга 2025 сыл балаҕан ыйын 1 күнүгэр аанын арыйар тутулла турар 40 №-дээх оскуолаҕа Саха сирин бастакы Бэрэсидьиэнэ Михаил Николаев аатын иҥэрдилэр.

«СӨ Бастакы Бэрэсидьиэнэ Михаил Ефимович Николаев төрөөбүт күнүгэр 40 №-дээх орто уопсай үөрэхтээһинин оскуолатыгар М.Е. Николаев аатын иҥэрэр туһунан  дьаһалга илии баттаатым»,-диэн бэйэтин ТГ-ханаалыгар Дьокуускай куорат баһылыга Евгений Григорьев иһитиннэрдэ.

Саҥа оскуола киин куоракка Иван Кульбертинов аатынан уулуссаҕа тутуллар. Үөрэх тэрилтэтэ 990 үөрэнээччигэ суоттаммыт. 2025 сыл балаҕан ыйын 1 күнүгэр үлэҕэ киирэрэ былааннанар. Оскуола уопсай иэнэ 17 тыһыынча квадратнай миэтэрэ. Өрөспүүбүлүкэ биир саамай улахан оскуолатынан буолуоҕа.