Саха сирин боксердара Тольяттига Бүтүн Арассыыйатааҕы турнирга кыттыахтара

Саха сирин сүүмэрдэммит хамаандатын боксердара Максим Припузов уонна Андрей Егоров Социалистическай Үлэ Дьоруойа Николай Семизоров аатынан, Сергей Онищенко уонна «Спартак» бириистэригэр ыытыллар Бүтүн Арассыыйатааҕы күрэхтэһиигэ кыттарга бэлэмнэнэллэр.

Бу туһунан Өрөспүүбүлүкэтээҕи сүүмэрдэммит хамаандалары успуорка бэлэмнээһин киинэ иһитиннэрэр. Турнир Тольятти куоракка тохсунньу 16 күнүттэн 22 күнүгэр диэри ыытыллыа. Бу күрэхтэһии юниордар икки ардыларыгар ыытыллар уонна Арассыыйаҕа бастыыр иһин күрэҕэр сүүмэрдиир түһүмэҕинэн буолар. Максим Припузов 51 киилэҕэ диэри ыйааһыҥҥа Саха сирин чиэһин көмүскүө, оттон Андрей Егоров 54 киилэҕэ диэри ыйааһыҥҥа киирсиэ.