Саха сирин «Боотур» хамаандата Бүтүн Арассыыйатааҕы «Путь воина» күрэхтэһиигэ кыайда

Балаҕан ыйын 15-19 күннэригэр Бүтүн Арассыыйатааҕы «Путь воина» байыаннай-тактическай күрэхтэһии буолан ааста. 

Күрэхтэһиигэ Хабаровскай кыраай, Волгоградскай, Тюмень уобалаһыттан уонна Саха сириттэн уопсайа 48 курсант кыттар. Хамаандалар тоҕус уустук тургутууну аастылар, кинилэри «Воин» киин ылбыт үөрүйэхтэрин уонна билиилэрин бэрэбиэркэлээтилэр. Кыттааччылар «Кыргыһыы хонуутугар киирии», «Суолу миинэттэн ыраастааһын», пневматическай саанан ытыы, ону таһынан бастакы көмөҕө уонна дроннары салайыыга күрэхтэстилэр.

Биһиги сүүмэрдэммит хамаандабытыгар 12 кыттааччы баар, хамандыыр Даниил Хохолов, курсаннар — Мухтар Кипкеев, Александр Варвариков, Мирлан Дьяконов, Владимир Христофоров, Эрчим Барашков, Дуолан Гоголев, Артём Степанов, Даниил Шерстобоев, Любовь Михайлова, Ксения Яндреева уонна Маргарита Герасимова. Хамаандан уопуттаах настаабынньыктар арыаллыаатылар: Надежда Семёнова — инструктор-методист, биатлоҥҥа успуорт маастара; Василий Находкин — педагог-психолог, пеадгогическай наука хандьыдаата, Кирилл Каратаев — тактическай мэдиссиинэ ыстаарсай инструктор-методиһа.

Финал бүгүн, балаҕан ыйын 19 күнүгэр буолла. Бүгүҥҥү быһаарыылаах күҥҥэ Саха сирин хамаандата Тюмень уобалаһын хамаандатын кытары бастыыр иһин кииристэ. Биһиги оҕолорбут айылҕабыт, күммүт-дьылбыт даҕаны биһиги туспутугар буолла диэн санааларын үллэһиннилэр.

Саха сирин «Боотур» хамаандатын оҕолорун сүргэлэрэ көтөҕүллүбүт, үөрүүлэрэ үксээбит. Буолумуна, маннык улахан суолталаах, саҥалыы тыыннаах күрэхтэһиигэ дойду бастыҥ хамаандаларын кыайар манан аҕай дьыала буолбатах.

Хамаанда кыайыыта барыларыгар чаҕылхай холобурунан буолла, биир сомоҕо буолуу уонна бэйэ-бэйэҕэ өйөһүү көмөтүнэн туруоруллубут сыаллары ситиһэр кыалларын көрдөрдө.
Саха сирин хамаандатын салайааччылара бу кыайыы саҥа ситиһиилэргэ уонна дьулуурдарга сирдиир, ону таһынан өрөспүүбүлүкэ уонна бүтүн Арассыыйа киэн туттуутун буолар диэтилэр. Оҕолор инструктордара, настаабынньыктара муҥура суох.

Маннык ситиһии, эрэли үөскэтэр, ханнык баҕарар мэһэйи туоруурга, эдэр көлүөнэ барыга кыахтааҕын итэҕэтэр. Бүгүн кыайыылаахтарга үгүс эҕэрдэ, уруй-айхал этилиннэ.

Санатан эттэххэ, «Путь воина» байыаннай-тактическай күрэхтэһии РФ бырабыыталыстыбатын бэрэссэдээтэлин солбуйааччы — РФ бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ, «ВОИН» киин кэтээн көрөр сэбиэтин бэрэссэдээтэлэ Юрий Трутнев көҕүлээһининэн ыытыллар.