Саха сирин булчуттарыгар бөртөлүөтүнэн быыһааһын ороскуотун толуйуу туһунан санаттылар

Саха сиригэр  сааскы халаан кэмигэр булчуттар арыыларга хаайтарар түгэннэрэ тахсааччы. Саха сирин бырабыыталыстыбатын бэрэссэдээтэлин бастакы солбуйааччы Дмитрий Садовников бөртөлүөтүнэн быыһаммыт булчуттар көтүү ороскуотун толуйуохтаахтарын санатта диэн СИА суруйар.

“Былырыыҥҥыттан биһиги өрүс арыыларыгар хаалбыт дьону тиэйии өҥөтүгэр счеттары түһэрэбит, өскөтүн кинилэр эрдэттэн сэрэппэтэх эбэтэр кутталлаах сиртэн кэмигэр барбатах буоллахтарына. Бөртөлүөт көтүүтүн биир чааһа – үгүөрү үп”, — диэтэ Дмитрий Садовников.

Бырабыыталыстыбата бэрэссэдээтэлин бастакы солбуйааччы булка көҥүлү кытта сэрэтэр өйдөбүнньүктэр туттарыллалларын бэлиэтээтэ. Ол иһин иэдээҥҥэ түбэһиэн сөптөөх дьон ол туһунан сэрэтилиннилэр уонна муус барыытын кэмигэр хааланнар олохторугар кутталы үөскэтэллэрин өйдүөхтээхтэр. Оттон быыһааччылар халааны хонтуруоллуур үлэҕэ наадалаах кыахтарын-күүстэрин барыыллар.

Ону таһынан Дмитрий Садовников булчуттар баһаартан сэрэхтээх буолуохтаахтарын туһунан эттэ.