Саха сирин бырааһа Лука Крымскай мэтээлинэн наҕараадаланна

РФ Бэрэсидьиэнин Владимир Путин Ыйааҕынан, Өрөспүүбүлүкэтээҕи 2 №-дээх балыыһа-Мэдиссиинэ Суһал киинин суһал кардиологияҕа отделениетын кардиолог-бырааһа Филипп Харлампьев  Лука Крымскай мэтээлинэн наҕараадаланна.

Филипп Харлампьев байыаннай дьайыыга мэдиссиинэ көмөтүн оҥорбут Саха сирин эмчиттэрин бастакы биригээдэтигэр сылдьыбыта. Үрүҥ халааттаах аанньал идэтигэр үрдүк таһымын, ыксаллаах быһыыга-майгыга мэдиссиинэ көмөтүн оҥорууга ытык иэһин чиэстээхтик толорбутун иһин наҕараадаланна.

Быһаарыы. Лука Крымскай мэтээлэ доруобуйа харыстабылын үлэһиттэригэр: чуолаан быраастарга, мэдиссиинэ орто уонна алын сүһүөх үлэһиттэригэр, ону тэҥэ мэдиссиинэ, фармация, научнай-чинчийэр, санаторий-курорт уонна нэһилиэнньэ доруобуйатын харыстабылын тэрилтэлэрин исписэлиистэригэр бэриллэр.