Саха сирин быраастара «Киһи уонна эмп-том» кэнгириэскэ кытыннылар
![](https://sakha-sire.ru/wp-content/uploads/2023/04/kongress-e1681549328233-1013x596.jpeg)
Муус устар 10-13 күннэригэр «Киһи уонна эмп-том» Бүтүн Арассыыйатааҕы ХХХ национальнай кэнгириэскэ СӨ Доруобуйа харыстабылын министиэристибэтин терапияҕа уонна быраас уопсай быраактыкатыгар штаты таһынан кылаабынай исписэлииһэ, ХИФУ Мэдиссиинэ институтун кафедратын доцена, мэдиссиинискэй наука хандьытаата У.С.Портнягина, Уопсастыбаннай доруобуйа уонна мэдиссиинискэй профилактика өрөспүүбүлүкэтээҕи киинин кылаабынай бырааһа А.М.Никитина, бу Киин ыарыы кутталын чахчыларын мониторинын отделын сэбиэдиссэйэ М.Н.Чукрова кытыннылар.
РФ доруобуйа харыстабылын миниистирэ Михаил Мурашко «Доруобуйа харыстабыла» уонна «Демография» национальнай бырайыактарга киллэриллибит соруктары толорор туһугар, доруобуйа харыстабылын, фармацевтика уонна үөрэхтээһин хардарыта бииргэ үлэлээһиннэринэн эрэ ыарыыттан өлүү аҕыйыырын уонна нэһилиэнньэ олоҕо уһуурун ситиһиэххэ сөбүн бэлиэтээтэ.
Доруобуйа харыстабыла киэҥ хабааннаах уларыйыылар түһүмэхтэригэр сылдьар. Ыарыыны эрдэттэн быһаарарга биир дьоһуннаах хайысханан ыарыыны сэрэтэр мэдиссиинискэй кэтээн көрүүлэр уонна диспансеризация буолаллар. Нэһилиэнньэҕэ диспансеризацияны тэрийии уонна мэдиссиинискэй кэтээн көрүү, билигин диагностика, сыыппаралаах технологиялар киирэллэрин учуоттаан, хос үөрэтиини эрэйэллэр. РФ доруобуйа харыстабылыгар миниистирэ ыарыыны сэрэтэр мэдиссиинискэй көрүүлэр уонна диспансеризация хаачыстыбаларын үрдэтэргэ тиһигин быспакка үлэ барара суолталааҕын бэлиэтээтэ.
Кэнгириэскэ араас былаһааккалар биэс саалаҕа тэҥинэн үлэлээтилэр. Кэнгириэс түмүгүнэн Арассыыйаҕа терапия сулууспатын сайдыытын сүрүн түһүмэхтэрин уонна бастакы сүһүөх мэдиссиинискэй-санитарнай көмө тиһигин дьоһун суолталаах соруктарын дьүүллэстилэр.
Сообщить об опечатке
Текст, который будет отправлен нашим редакторам: