Саха сирин Бырабыыталыстыбата элбэх оҕолоох ыаллары өйүүр дьаһалын кэҥэтэр

СӨ Бырабыыталыстыбатын салалтата элбэх оҕолоох ыалларга дьиэ- уот, коммунальнай өҥөлөрү туһаныы иһин чэпчэтиилэри көрүү уонна орто анал үөрэххэ төлөөн үөрэнэ сылдьар оҕолордоох буоллахтарына биир кэмнээх төлөбүрү оҥоруу  бэрээдэгин бигэргэттэ.

Бу кинилэр үөрэтэр сыаналарын сорҕотун үлэ ырыынагар кэскиллээх уонна наадалаах  идэлэри ыларга төлүүр төлөбүрдэрин сорох чааһын толуйарга көлөһүө диэн СӨ Бырабыыталыстыбатын пресс-сулууспата иһитиннэрэр.

Туһааннаах статустаах өрөспүүбүлүкэ элбэх оҕолоох ыалларыгар олорор дьиэ-уот коммунальнай өҥөлөрүн иһин төлөбүр 30 %-н толуйууга чэпчэтии көрүллэр. Төлөбүр өрөспүүбүлүкэ иһигэр баар биир эрэ олорор дьиэ ананыаҕа.

Оттон элбэх оҕолоох ыал анал орто үөрэххэ үөрэнэр оҕотугар төлөбүр биир кэмнээх харчы төлөбүрэ үөрэнэрин тухары биирдэ эрэ 50 тыһ. солк. бэриллиэ. Бу чэпчэтиилэри уонна төлөбүрдэри ылыыга сайабылыанньалары биир кэлим эбэтэр эрэгийиэннээҕи судаарыстыбаннай портал итиэннэ Элбэх өҥөнү оҥорор киин уонна олорор сиргитинэн Социальнай көмүскэл управлениетын нөҥүө биэриэххэ сөп.

СӨ Бырабыыталыстыбатын Бэрэссэдээтэлэ Кирилл Бычков  элбэх оҕолоох ыалларга тус көмөнү кэҥэтии, Саха сиригэр баар көмө дьаһалларын өссө көдьүүһүрдэрин тоһоҕолоон бэлиэтээтэ.

«2025 сыл тохсунньу 1 күнүттэн Арассыыйа Бэрэсидьиэнэ Владимир Владимирович Путин быһаарыытынан «Дьиэ кэргэн» саҥа национальнай бырайыак үлэҕэ киириэҕэ. Олор эдэр, элбэх оҕолоох ыаллары уонна аҕам саастаах дьону өйүүргэ туһуланыахтаах», – диэн Кирилл Бычков эттэ.