Саха сирин быыһааччылара үс сураҕа суох сүппүт эр дьону көрдүүллэр

Саха сиригэр үс эр киһи сураҕа суох сүппүт. Көрдөөһүн үлэлэрэ Алдан, Хаҥалас уонна Орто Халыма улуустарыгар ыытыллаллар.

Бу туһунан атырдьах ыйын 5 күнүгэр Саха сиринээҕи Быыһыыр сулууспатын пресс-сулууспата иһитиннэрдэ. Сүппүт дьонтон биирдэстэрэ от ыйын 10 күнүттэн биллибэт.

46 саастаах эр киһи Орто Халыма улууһун Уоруйахтаах диэн сиргэ тахсыбы уонна күн бүгүҥҥү  диэри туох да сураҕа суох. Эр киһини көрдүү Халыматааҕы этэрээттэн икки быыһааччылар таҕыстылар.

Алдан улууһугар атырдьах ыйын 3 күнүгэр Үөһээ Кураанах сэлиэнньэтин уонна Алдан куорат икки ардыларыгар сүппүт 48 саастаах эр киһини көрдүүллэр. Эр киһини көрдөөһүҥҥэ икки быыһааччы, икки полиция үлэһитэ уонна 21 үтүө көмөһүт кыттар.

Хаҥалас улууһугар үс водолаз 36 саастаах эр киһини көрдөөн, Өлүөнэ эбэни чинчийэллэр. Кытылга сүппүт киһи мала-сала — үрүксээгэ уонна саппыкыта көстүбүт, оттон өрүскэ кураанах мотуордаах оҥочото булуллубут. Көрдөөһүҥҥэ ону таһынан 30 үтүө көмөһүт кыттар.

Маны таһынан, Саха сиринээҕи Быыһыыр сулууспа хонтуруолугар Өлүөхүмэ улууһугар 33 саастаах эр киһини көрдөөһүн турар. Кини атырдьах ыйын 3 күнүгэр Өлүөнэ эбэҕэ Таас Хайа диэн сир аттыгар ууга түспүт. Эр киһини Өлүөхүмэтээҕи ГИМС үлэһиттэрэ уонна аймахтара көрдүүллэр.