Саха сиригэр дьахталлар спартакиадаларыгар алта сүүстэн тахса спортсмен кыттар

Саха сирин дьахталларын VIII спартакиадаларыгар улуустартан уонна куорат уокуругуттан уопсайа 23 хамаанда (барыта 649  спортсмен) кыттар. 

Дьокуускайга «Кыайыы 50 сыла» успуорт дыбарыаһыгар судьуйалар кэллиэгийэлэрин уонна хамаандалар бэрэстэбиитэллэрин мунньаҕа буолла.

VIII төгүлүн ыытыллар Саха сирин дьахталларын спартакиада өрөспүүбүлүкэ киин куоратыгар бүгүн, балаҕан ыйын 26 күнүттэн саҕаланна. Кылаабынай судьуйа Альберт Трофимов түһүлгэҕэ мустубут успуорт көрүҥнэригэр сүрүн судьуйалары уонна спартакиада бырагырааматын билиһиннэрдэ.

Кыттааччылары уонна хамаандалар бэрэстэбиитэллэрин СӨ физическэй култууратын уонна успуордун миниистрин бастакы солбуйааччы Гаврил Мохначевскай, дьахталлар түмсүүлэрин сойууһун бэрэссэдээтэлэ Анжелика Андреева, СӨ физическэй култуура уонна маассабай успуорт управлениетын салайааччыта Роман Оконешников, Азия оонньууларын боруонса призера, Парижка 2024  с. ыытыллыбыт Олимпийскай оонньуу кыттыылааҕа, чэпчэки атлетикаҕа норуоттар икки ардыларынааҕы кылаастаах успуорт маастара Сардаана Трофимова эҕэрдэлээтилэр.

СӨ Ил Дарханын уонна Бырабыыталыстыбатын пресс-сулууспата