Саха сирин дэлэгээссийэтэ Кыайыы күнүгэр аналлаах тэрээһиҥҥэ кытынна

Саха сирин дэлэгээссийэтэ Кыайыы күнүн иннинэ Новгород уобалаһын Старорусскай оройуонугар буойуттар пааматынньыктарыгар сырытта.

Бу Буреги, Устрека, Ретлё дэриэбинэлэригэр диэн Арассыыйа Федерациятын Президенигэр Саха Өрөспүүбүлүкэтин сис бэрэстэбиитэлистибэтэ иһитиннэрэр.

Ильмень күөл кытылыгар пааматынньык таһыгар долгутуулаах тэрээһин буолла. Саха сирин дэлэгээссийэтин Старорусскай оройуон баһылыга Елена Комарова, оройуон Дууматын салалтата, олохтоохтор, бэтэрээннэр уонна көрдөөһүн үлэтинэн дьарыктанар дьон көрүстүлэр. Миитиҥҥэ «Медведь» этэрээт хамандыыра Игорь Тума уонна Саха сириттэн кыраайы үөрэтээччи Ксенофонт Васильев «Вахты Памяти» диэн көрдүүр-ирдиир үлэҕэ Сунтаар улууһуттан үөрэнээччилэри кытыннарыы түмүгүн туһунан кэпсээтилэр.

Икки нэдиэлэ устата Саха сирин оҕолоро Сургуттан уонна Воронежтан бу көрдүүр-ирдиир үлэҕэ кыттааччылары кытары Ильмень күөл кытылыгар улахан үлэни ыыттылар уонна бөҕү-сыыһы хомуйдулар. Сыралаах үлэлэрин түмүгүнэн, кинилэр биир байыас уҥуоҕун буллулар. Атыттар сытар сирдэрин, хомойуох иһин, билигин уу ылан турар. Аҕа дойду сэриитин толоонугар охтубут буойуттар көмүс уҥуохтарын көрдөөһүн үлэтэ күһүн «Вахта Памяти» салҕаныа. РФ Президенигэр Саха Өрөспүүбүлүкэтин Бастайааннай бэрэстэбиитэлин солбуйааччы Евгений Петров Саха сирин буойуттарын ааттарын үйэтитии үлэтигэр көмөлөрүн сыаналаан, бэлиэтээн туран, «Саха АССР 100  сыла» бэлиэни Игорь Тумаҕа, Ксенофонт Васильевка уонна Инна Поздняковаҕа туттарда. Маны сэргэ, Сунтаар улууһуттан гимназия уонна лиссиэй-интэринээт үөрэнээччилэрэ уонна педагогтар махтал суруктары, бэлэхтэри туттулар.

Ыам ыйын 8 күнүгэр Ленинград уобалаһын Мгинскэй оройуонун Саҥа Малукс бөһүөлэгэр сэбиэскэй буойуннар көмүс уҥуохтарын кистээтилэр. Кинилэр ортолоругар аата-суола чочуламмыт Саха сирин саллаата, Мэҥэ Хаҥалас оройуонуттан Алтан нэһилиэгиттэн төрүттээх Билюкин Спиридон Семенович баар. Буойуттар көмүс уҥуохтарын кистиир сиэргэ-туомҥа С.С.Билюкин аймахтара кыттыыны ыллылар. Көрдүүр-ирдиир үлэнэн дьарыктанааччылар кинилэргэ саллаат жетонун уонна көмүс уҥуоҕа кистэммитин туһунан докумуону туттардылар. Саха сирин дьоно-сэргэтэ «Курск» көрдүүр-ирдиир этэрээккэ уонна бу этэрээккэ байыаһынан сылдьыбыт, буойун аймахтарын түргэнник булбут Саха сирин устудьуонугар Татьяна Артемьеваҕа махтаннылар.

Улуу Кыайыы күнүн иннинэ Саха сирин дэлэгээссийэтэ Пискаревскай мемориальнай кылабыыһатыгар тэрээһиҥҥэ сырытта. Мемориалга сибэкки дьөрбөлөрүн уонна веноктары уурууга федеральнай уонна эрэгийиэн органнарын, бэтэрээннэр уопсастыбаннай түмсүүлэрин бэрэстэбиитэллэрэ, уо.д.а. кыттыыны ыллылар.  Бастайааннай бэрэстэбиитэлистибэ сүрүн сүбэһитэ Станислав Константинов салайааччылаах Саха сирин дэлэгээссийэтэ монумеҥҥа венок уурда.

СӨ Ил Дарханын уонна СӨ Бырабыыталыстыбатын пресс-сулууспата