Саха сирин дэлэгээссийэтэ ЛНӨ-гэр «төгүрүк остуолга» кытынна

Ил Түмэн Бэрэссэдээтэлэ Алексей Еремеев салайааччылаах Саха сирин дэлэгээссийэтэ Луганскай Норуодунай Өрөспүүбүлүкэҕэ «Муниципальнай тэриллиилэргэ Ийэ дойду көмүскээччилэрин ааттарын үйэтитиигэ уонна өйдөбүнньүктэри харыстааһыҥҥа бастыҥ үлэлэр» диэн «төгүрүк остуол» үлэтигэр кытынна.

Тэрээһин Луганскайга ЛНӨ киин куоратын фашист халабырдьыттарыттан босхолооһун 83 сылын көрсө ыытылынна. «Төгүрүк остуолга» Саха Өрөспүүбүлүкэтин, ЛНӨ Норуодунай Сэбиэтин дьокутааттара, ДНӨ, Ростов уонна Воронеж уобаластарын, Марий Эл Өрөспүүбүлүкэтин парламеннарын, ЛНӨ Бырабыыталыстыбатын, «ЛНӨ-гэр Ийэ дойду көмүскээччилэрэ» пуонда, ЛНӨ олохтоох салайыныы уорганнарын уонна култуура тэрилтэлэрин бэрэстэбиитэллэрэ кытыннылар. Саха сирин парламенын спикерэ Алексей Еремеев өрөспүүбүлүкэҕэ устуоруйа өйдөбүнньүгүн, патриотическай иитии уонна устуоруйа бырайыактарын олоххо киллэриигэ гражданнары тардыы үлэтин туһунан кэпсээтэ.

СӨ Ил Дархана Айсен Николаев көҕүлээһининэн Аҕа дойду Улуу сэриитигэр Кыайыы 80 сылын сылыгар саҕаламмыт «Өйдөбүнньүк бастионнара» патриотическай бырайыак олоххо киирэр. Бу көрдүүр архыып үлэ түмүгүнэн кимнээхтэрэ быһаарыллыбыт, Аҕа дойду Улуу сэриитин сылларыгар Саха сириттэн төрүттээх буойуттар кыргыспыт уонна өлбүт сирдэригэр мемориальнай комплекстары тутуу буолар.

2025 сыл бэс ыйын 21 күнүгэр Волгоградка Мамаев кургаҥҥа «Өйдөбүнньүк бастионнара» бырайыак чэрчитинэн бастакы мемориал — «1942–1943 сс. Сталинграды көмүскээччилэр —  Саха сирин буойуттара» обелиск үөрүүлээх арыллыыта буолбута. Атырдьах ыйын 24 күнүгэр Новгород уобалаһыгар иккис мемориал арыллыбыта. Онно кыргыһыы толоонугар охтубут Саха сириттэн төрүттээх 1 589 киһи аата үйэтиллибитэ. Ахсынньы 17 күнүгэр Смоленскай уобалас Гагарин куоратыгар Саха сириттэн буойуттарга пааматынньык арыллыбыта. 2026 сыллаахха Калуга уобалаһыгар, салгыы — Ростов уобалаһыгар, Донецкай Норуодунай Өрөспүүбүлүкэтигэр уонна Беларусь Өрөспүүбүлүкэтигэр мемориаллары арыйыы былааннанар.

Санаттахха, Саха сиригэр судаарыстыба харыстабылыгар турар 1944 култуурунай нэһилиэстибэ эбийиэгэ баар, онтон 835-һэ Арассыыйа Федерациятын норуоттарын култуурунай нэһилиэстибэтин эбийиэктэрин (устуоруйа уонна култуура пааматынньыктарын) биир кэлим судаарыстыбаннай реестригэр киллэриллибиттэр, оттон 1109 — саҥа быһаарыллыбыт култуурунай нэһилиэстибэ эбийиэктэрэ. СӨ Ил Дархана өрөспүүбүлүкэҕэ 2026 сылы Култуура сылынан биллэрбитэ. Сиһилии: https://www.sakha.gov.ru/news/26272