Саха сирин дзюдоисткалара Russian Judo Tour турнир призердарынан буоллулар

Москваҕа норуоттар икки ардыларынааҕы Russian Judo Tour профессиональнай күрэхтэһии финала түмүктэннэ.

Саха сирин спортсменкалара Карина Ефимова уонна Надежда Татарченко үрүҥ көмүс уонна боруонса мэтээллэргэ тигистилэр.

Бу улахан успуорт тэрээһинигэр 19 дойдуттан 90 дзюдоист кытынна. Бочуоттаах ыалдьыт, Олимпийскай чөмпүйүөн Тагир Хайбулаев бу күрэхтэһии тэрээһининэн «Большой шлем» күрэхтэһиигэ уонна Европа чөмпүйэнээтигэр тэҥнээтэ.

52 киилэҕэ диэри ыйааһыҥҥа татамига икки чаҕылхай фавориттар күөн көрүстүлэр – Арассыыйа чөмпүйүөнэ Карина Ефимова уонна дойду сүрүн турнирын үрүҥ көмүс призера Лилия Нугаева. Кыргыттар күүстээх утарсыыны, тыҥааһыннаах утарыта киирсиини көрдөрдүлэр. Оттон Надежда Татарченко 78 киилэҕэ диэри ыйааһыҥҥа боруонса мэтээли ылла. Спортсменка контр-прима көмөтүнэн Белоруссия дзюдоисткатын Дарья Концеваяны кыайда.