Саха сирин дзюдоистара Арассыыйа Куубагар кыттыахтара

Саха сирин дзюдоҕа сүүмэрдэммит хамаандатын лиидэрдэрэ ахсынньы 14-17 күннэригэр Нижнэй Новгородка буолар Арассыыйа Куубагар кыттыахтара. Сылы түмүктүүр улахан күрэхтэһиигэ дойду араас муннугуттан 500-чэ кыттааччы күрэхтэһиэҕэ.

«Арассыыйа Куубагар Саха сирин аатыттан 48 киилэҕэ Сайыына Петрова уонна 78 киилэҕэ Ольга Лихота күрэхтэһиэхтэрэ. Атын спортсменнарбыт дойду сүүмэрдэммит хамаандатын кытта Сочига хомуурга сылдьаллар», — диэн дзюдоҕа Саха сирин сүрүн тириэньэрэ Дамдиндорж Гомбодорж СИА-ҕа иһитиннэрэр.

Бүгүн, ахсынньы 14 күнүгэр, күрэхтэһии сэрэбиэйэ буолуоҕа. Сарсын татамига Ольга Лихота тахсыаҕа. Оттон Сайыына Петрова ахсынньы 17 күнүгэр илин-кэлин түсүһүөҕэ. Куубакка дойду 45 эрэгийиэниттэн спортсменнар кытталлара былааннанар.