Саха сирин дзюдоистара Уһук Илин первенствотыгар кыайдылар

Саха сирин сүүмэрдэммит хамаандатын дзюдоистара юниордар ортолоругар Уһук Илин первенствотыгар икки кыһыл көмүс, үстүү үрүҥ көмүс уонна боруонса мэтээли туттулар.

21 саастарыгар диэри күрэсчиттэр күрэхтэһиилэрэ алтынньы 11 күнүгэр Владивосток куоракка буолан ааста. Бу туһунан «Триумф» успуорт киинигэр иһитиннэрдилэр. Кыргыттар ортолоругар 48 киилэҕэ диэри ыйааһыҥҥа Саха сирин сүүмэрдэммит хамаандатын икки бэрэстэбиитэлэ финалга көрсүстүлэр. Түмүгэр Виктория Матаркина кыайыылааҕынан таҕыста, оттон Диана Вихарева үрүҥ көмүс мэтээлгэ тигистэ.

Бу иннинэ киирсиилэргэ кинилэр Приморскай, Хабаровскай кыраайдар уонна Бурятия бэрэстэбиитэллэрин баһыйбыттара. Өссө биир кыһыл көмүс мэтээли хамаандаҕа 78 киилэттэн үөһэ ыйааһыҥҥа Милена Егорова тутта. Алиса Анисимова (63 кг) сэттэ кыттааччыттан үрүҥ көмүс призерунан буолла. Бөлөҕүнэн түһүмэххэ кини иккитэ кыайбыта, ол эрээри финалга Хабаровскай кыраай  күрэсчитигэр хотторбута. Иккис миэстэни эмиэ Назир Картоев (73 кг) ылла. Быһаарыылаах киирсиигэ кини Хабаровскайтан сылдьар күрэсчиккэ хоттордо. Боруонса призердарынан Анастасия Попова (57 кг), Никита Кулиев (60 кг) уонна Кирилл Семиженко (73 кг) буоллулар.