Саха сирин эдэр боксера Хабаровскайга боксаҕа норуоттар икки ардыларынааҕы турнир призерунан буолла

Хабаровскайга Сэбиэскэй Сойуус Дьоруойа Константин Коротков кэриэһигэр боксаҕа аан дойдутааҕы турнир түмүктэннэ.

Аҕа дойду Улуу сэриитигэр Кыайыы 80 сылыгар аналлаах күрэхтэһии 48-с төгүлүн ыытылынна. Туринир Арассыыйа, Кытай, Корея, Куба, Беларусь, Монголия, Казахстан уонна да атын дойдулар бастыҥ боксердарын түмтэ.

Саха сириттэн боксаҕа саамай кыра ыйааһыннаахтарга үс спортсмены туруордулар. Сэрэбиэй быһыытынан бастакы эргииргэ Михаил Прокопьев Казахстантан аан дойду чөмпүйүөнэ Темиртас Жусуповы, оттон Эрчим Пестряков эмиэ бастакы киирсиигэ Хотугу Кореяттан Чай Ганг утарсааччытыгар хоттордо.

Турнир пьедесталыгар Хаҥалас улууһуттан 19 саастаах чөмпүйүөнэ Максим Припузов таҕыста. Кини полуфиналга Арассыыйа чөмпүйүөнэ, уопуттаах Володя Мнацаканяны кытта кииристэ.

«Максим куһаҕана суох тиэхиникэни уонна тактическайдык баһыйарын эрэ буолбакка, утарылаһааччытын чиэстээхтик тулуйарын көрдөрдө. Бу турнир аан дойду түһүлгэтигэр киниэхэ бастакы боруобалааһынан буолар. Эдэр сааһыгар, уопута суох да буоллар, бэйэтин үчүгэй өттүнэн көрдөрдө» — диэн ТГ-ханаалга Арассыыйа боксаҕа федерациятын Сэбиэтин састаабыгар сылдьар аатырбыт боксер Василий Егоров суруйда.