Саха сирин эдэр ырыаһыттара Уһук Илин хор олимпиадатыгар кыайдылар

Владивосток куоракка ыытыллыбыт III Уһук Илиннээҕи хор олимпиадаҕа Саха сириттэн «Надежда Туймаады» хор уонна «Северные орлята» вокальнай ансаамбыл үрүҥ көмүс мэтээллэргэ тигистилэр. Бу туһунан sakha.gov.ru иһитиннэрэр.

«Надежда Туймаады» хор «Кыра саастаах оҕолор хора» номинацияҕа, оттон «Северные орлята» уолаттар вокальнай ансаамбыллара «Оҕо вокальнай ансаамбыллара» номинацияҕа дьупулуомнарынан уонна үрүҥ көмүс мэтээллэринэн наҕараадаланнылар.

Кыайыылаахтар Дьокуускай куорат 1 №-дээх оҕо ускуустубатын оскуолатын «Хоровой ырыа» салаатын иитиллээччилэрэ. Кинилэр учуутал Надежда Попова салайыытынан дьарыктаналлар, концертмейстер – Ксения Шильникова.

Оҕолор 12 номинациялаах уустук аан дойдутааҕы күрэххэ кытыннылар. Кыттааччылары аан дойду таһымнаах дьүүллүүр сүбэ сыаналаата. III Уһук Илиннээҕи хоровой олимпиадаҕа Арассыыйа 16 эрэгийиэниттэн 93 хоровой кэлэктиип, ону тэҥэ Кытай Норуодунай Өрөспүүбүлүкэтиттэн кэлэктииптэр кытыннылар. Тэрээһиҥҥэ уопсайа 2300-тэн тахса киһи кыттыыны ылла.

Саха сиригэр оҕо ускуустубатын сайыннарыы үлэтэ РФ бэрэсидьиэнэ Владимир Путин көҕүлээбит «Култуура» национальнай бырайыагын чэрчитинэн ыытыллар. Судаарыстыба баһылыга оҕолор айар сайдыыларын өйүүр соруктары туруорар. Бу соруктар оҕо ускуустубатын оскуолаларын өрөмүөннээһин уонна тэрийии,  материальнай баазаларын уонна үөрэх бырагыраамаларын өйөөһүн, ону тэҥэ эдэр талааннары өйүүргэ туһуламмыт атын бырайыактар нөҥүө олоххо киирэллэр.