Саха сирин эмчиттэрэ Доннааҕы Ростов байыаннай госпиталыгар байыаннай быраастарга көмөлөһөллөр

Саха сирин эмчиттэрэ Доннааҕы Ростов байыаннай госпиталыгар байыаннай быраастарга көмөлөһөллөр. 

Саха сирин баһылыгын сорудаҕынан командировкаҕа барбыт Саха сирин быраастарын иккис биригээдэтэ Доннааҕы Ростовка РФ Оборуонаҕа министиэристибэтин 1602-с Байыаннай клиническэй госпиталыгар үлэлииллэр. Байыаннай быраастар гражданскай кэллиэгэлэригэр көмөлөрүн иһин махтаналлар.

“Икки хирург-быраас – Өлөөн киин балыыһатын кылаабынай бырааһа Назар Аммосов уонна хирург-быраас Анатолий Слепцов — суһал хирургия отделениетыгар, Мэдиссиинэ национальнай киинин педиатрия киинин травматология отделениетын сэбиэдиссэйэ, травматолог-быраас Сергей Васильев – госпиталь травматологическай отделениетыгар үлэлииллэр. Кинилэр эмсэҕэлээбит дьоҥҥо көмөлөһөллөр, эпэрээссийэҕэ ассистенныыллар, бэрэбээскилииллэр, отделениеларга уонна приемнай покойга сүбэ-ама биэрэллэр. Дьокуускайга өрөспүүбүлүкэтээҕи психоневрологическай диспансер кылаабынай бырааһын э.т. Туяра Решетникова психиатрия отделениетыгар үлэлээн, байыаннай хамыыһыйаларга кыттар”, — диэн быраастар мобильнай биригээдэлэрин салайааччыта, Уопсастыба доруобуйатыгар уонна мэдиссиинискэй сэрэтиигэ өрөспүүбүлүкэтээҕи киинин кылаабынай бырааһа Алена Никитина иһитиннэрдэ.

Байыастары уонна госпиталь салалтатын кытта көрсүһүүлэр тэриллэллэр, Саха сириттэн сылдьааччылар испииһэктэрин чопчулууллар. “Байыананй сулууспалаахтар – анал эпэрээссийэ кыттыылаахтарын төрөппүттэрин кытта үлэлиибит. Саха сиригэр уонна Москваҕа сүрүннүүр киини кытта сибээһи тутабыт”, — диэтэ Саха сирин быраастарын биригээдэтин салайааччыта.

Араас көмө наада. Байыастары байыаннай дьайыы хонуутуттан таһаараллар, ол иһин докумуоннарын чөлүгэр түһэриигэ, саҥа СИМ-каарталары эбэтэр суотабай төлөпүөннэри атыылаһыыга көмөлөһөллөр.

Өрөспүүбүлүкэттэн тиийбит быраастар эчэйбиттэри кытта күн аайы көрсүһэллэр. “ РФ Оборуонаҕа министиэристибэтин 1602-с Байыаннай клиническэй госпитала наардыыр пуунунан буолар. Ыарыһахтар манна өр сыппаттар, бастакы көмөнү оҥорон баран, салгыы эмтэнэллэригэр уонна чөлүгэр түһэллэрин туһугар тыылга баар байыаннай госпиталларга ыыталлар. Саха сириттэн сылдьар байыастар санаалара бөҕөх”, — диэн Алена Никитина бэлиэтээтэ.

Байыаннай эпэрээссийэ ыытыллар сириттэн чугас баар байыаннай бастакы мэдиссиинискэй тэрилтэнэн буолар Доннааҕы Ростов байыаннай госпиталыгар Саха сириттэн быраастар үлэлэрин тэрийэр соругу өрөспүүбүлүкэ баһылыга Айсен Николаев туруорбута.

Саха Өрөспүүбүлүкэтин Ил Дарханын уона Саха Өрөспүүбүлүкэтин Бырабыыталыстыбатын пресс-сулууспата

Хаартыска Алена Никитина тиксэриитэ.