Саха сирин өрүстэригэр уу таһыма түһэн эрэр

Саха сирин өрүстэригэр Алдан эбэ сорох учаастактарыттан уратыларга уу таһыма түһэн эрэр, диэтэ өрөспүүбүлүкэ Экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы Анатолий Алексеев.

Кини этэринэн, билигин Томпо, Таатта, Уус Алдан, Кэбээйи оройуоннарыгар уу таһыма үрдүк.

“Хара уу ааһарыгар Алдан эбэҕэ муус барар кэминээҕэр 4-6 миэтэрэнэн көрдөрүү үрдээтэ”, — диир Алексеев.

Томпо оройуонун Охотскай Перевоз нэһилиэнньэлээх пуунугар уу таһыма 1214 см (ыксалааҕа 1190 см). Хаандыга бөһүөлэгин аннынан уу күүскэ ааһыа, ол кэнниттэн аччыыра күүтүллэр. Оттон Нерюнгри, Алдан уонна Уус Маайа оройуоннарыгар уу таһыма сыыйа түһэн эрэрэ көстөр.

Өрөспүүбүлүкэ атын өрүстэригэр – Өлүөнэҕэ, Халымаҕа, Дьааҥыга, Индигииргэ муус бара турар. Бүлүү эбэҕэ уу улахан эрээри, үгүс учаастактарга уу таһыма түһэн эрэр. Дьааҥыга сөҥүүттэн  сылтаан кыратык уу халыйда.

“Сэрэтэр үлэлэр ыытылыннылар. Уу таһыма түстэҕинэ, хамыыһыйа үлэлиэҕэ”, — диэтэ Алексеев.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата