Саха сирин өрүстэрин бүгүҥҥү туруга

Бүгүҥҥү туругунан Өлүөнэ өрүс мууһун алын кирбиитэ Уус Кут бөһүөлэгиттэн аллара 15 км бэлиэтэнэр. Муус суукка иһигэр 95 км барбыт.

Дьокуускйадааҕы күнү-дьылы кэтээн көрөр сулууспа чопчуламмыт дааннайынан өрөспүүбүлүкэ кыраныыссатыгар ыам ыйын 9-12 күннэригэр киириэ. Витим – Пеледуй учаастагар ыам ыйын 9-12 күннэригэр (нуорма 8.05) Пеледуй – Ленскэй ыам ыйын 12-15 күннэригэр (нуорма 12.05) кэлиэ.

Онон Саха сирин территориятыгар уруккутааҕар 1-3 суукка эрдэ кэлэрэ сабаҕаланар. Ол курдук Өлүөнэ өрүс Ленскэй уонна Өлүөхүмэ оройуоннарын чэрчилэринэн ыам ыйын 8-15 күннэригэр, Покровскай – Дьокуускай – Кангаласс ыам ыйын 15-18 күннэригэр, Сангаар ыам ыйын 19-21 күннэригэр, Күһүүр диэки ыам ыйын бүтэһик күннэригэр күүтүллэр.

Ыам ыйын иккис аҥарыгар Алдан, Амма уонна Бүлүү өрүс арыллыахтара. Оттон өрөспүүбүлүкэ хоту уонна хотугулуу-илиҥҥи өрүстэригэр бэс ыйын бастакы дэкээдэтигэр устуохтара.

Өлүөхүмэ өрүс үөһээ өттүгэр (Өлүөнэ өрүс уҥа салаата) кыдьымах уһунна. Өрүс эстэригэр уутун таһыма нуорматтан 0,9 м буолбута. Өлүөхүмэ өрүс Дьиикимдэ – Куду Күөл учаастагар суукка иһигэр +11+30 см уу таһыма үрдээбит.

Витим өрүскэ (Өлүөнэ өрүс уҥа салаата) муус кыратык өрө көтөҕүллүбүт.

Тээнэ өрүскэ уу таһыма    +32 см үрдээбитэ, муус көтөҕүллүбүтэ бэлиэтэнэр. Ыам ыйын 7-8 күннэригэр өрүс арыллара сабаҕаланар.

Марха өрүс Маалыкай сэлиэнньэтин аннынан уу +48 см эбиллибитэ бэлиэтэнэр.

Алдан өрүскэ уонна кини салааларыгар 2-н 42 см диэри уу таһыма муҥутуур үрдээн иһэрэ, муус көтөҕүллүбүтэ көстөр.

Амма өрүскэ уу таһыма суукка иһигэр 3-н 54 см, муус көтөҕүллүбүтэ, оттон  Бүлүү өрүскэ 8-н 29 см диэри үрдээбитэ бэлиэтэнэр.

Яна, Индигиир уонна Халыма өрүстэргэ муус кыһыҥҥылыы турар.