Саха сирин өрүстэринэн быйыл 1,1 мөл. туонна таһаҕаһы тиэйии былааннанна

Саха сиригэр кэлэр навигация сезонугар бэлэмнэнии үлэтэ саҕаланна. Быйыл өрөспүүбүлүкэ ыраах сытар оройуоннарыгар ас-үөл, уматык уонна эмп- томп 1,1 мөл. туоннаттан тахса тыын суолталаах таһаҕаһы тиэрдиитэ былааннанар. Бу туһунан СӨ Бырабыыталыстыбатын Бэрэссэдээтэлин бастакы солбуйааччыта Дмитрий Садовников иһитиннэрдэ.

Кини этэринэн, быйыл навигация күн-дьыл туругуттан көрө эрдэ саҕаланыаҕа. «2025 сыллааҕы навигация халлаан сылыйыытынан Өлүөнэ өрүскэ эрдэ аһыллыаҕа. Ол эрээри сүрүн ыарахаттар Амма уонна Бүлүү өрүстэригэр, уустук гидрологическай усулуобуйаларынан, ону тэҥэ Арктика оройуоннарыгар -Дьааҥы уонна Халыма өрүстэр бассейннарыгар күүтүллэр», — диэн Садовников эттэ.

Бастакы вице-премьер бэлиэтээбитинэн, уу тырааныспарын 3,6 тыһыынча үлэһиттээх 722 суудуната уонна 43 портальнай кыраана бэлэмнэннэ. Быйыл субсидия схемата уларыйда – билигин тэрилтэлэр эрдэ буолбакка толуйууну ый ахсын ылаллар, онон кыра таһаҕаһы тиэйэр тэрилтэлэргэ кыһалҕалары үөскэтэр. Итинэн сибээстээн кини миинистиэристибэлэргэ бу боппуруоһу быһаарарга сорудахтаата. Сүбэ мунньахха туспа болҕомто уу суолларын бары тутаах учаастактарыгар үлэни түмүктүүргэ уонна экипажтарын комплектациялааһыҥҥа уурулунна.