Хаартыска: СИА.
“Кыайыы 50 сыла” успуорт комплекска “Азия оҕолоро” оонньуулар мини-футболга сүүмэрдэммит хамаандаларын бастакы көрсүһүүлэрэ буоллулар. Билиҥҥитэ икки утарсааччытын Кыргызстан уонна Сибиирдээҕи федеральнай уокурук хамаандаларын хотон, Саха сирэ инники баран иһэр.
“Үчүгэй, сэргэх оонньуулар буола тураллар. Көрөөччүлэр умсугуйан туран көрөллөр. Ордук, билиҥҥитэ кыайан иһэр Саха сирин хамаандатыгар “ыалдьаллар”. Ол эрээри, кинилэр билигин күүстээх утарсааччылары кытта оонньуу иликтэр. Түмүк туһунан этэр билигин да эрдэ. Иннибитигэр өссө 25-27 оонньуу күүтэр. Үс бастыҥ миэстэ туһугар түмүктүүр түһүмэххэ кимнээх тахсаллара бу оонньуулар түмүктэринэн биллиэҕэ” — диэн СИАҕа Калугаттан сылдьар мини-футболга (футзал) Бүтүн Арассыыйатааҕы категориялаах судьуйа Алексей Кормушкин кэпсиир.
Саала толору, Саха сирин олохтоохторо бэйэлэрин эдэр спортсменнарын туһугар көхтөөхтүк “ыалдьаллар”. Футболистар кыайыы туһугар кыахтарын барытын ууран туран оонньууллар. Оонньуур сиргэ миэдиктэр дьуһуурустубаҕа олороллор, ким эмэ эчэйиини ылла да тута бастакы көмөнү оҥороллор.
Саха сирин хамаандата 2008 сыллаахха төрөөбүт 12 оонньооччуттан турар. Оҕолор “Азия оҕолоро” оонньууларга кэлиҥҥи балтараа сыл күүскэ бэлэмнэммиттэрэ. Бэҕэһээ уонна бүгүн Кыргызстан уонна Сибиирдээҕи федеральнай уокурук сүүмэрдэммит хамаандаларын кытта бастакы оонньууларга 9:3 уонна 16:0 ахсаанынан кыайбыттара. Кыттааччылар этэллэринэн, сорук биир, ол туолуохтаах.
“Кыайдыбыт. Бу биһиги сүрүн сорукпут, ол – туолла. Бэҕэһээ эмиэ тириэньэрбит туруорбут соругун толорбуппут. Түгэни хонтуруоллуубут, мээчиги тэбэбит уонна кыайабыт, бу биһигиттэн ирдэнэр сорук. Бу курдук тэтимнээхтик кыайар туһугар кэлэр оонньуулары кэтэһэбит” – диэн өрөспүүбүлүкэ сүүмэрдэммит хамаандатын чилиэнэ Грач Гаспарян санаатын үллэстэр.
Санатан эттэххэ, мини-футболга күрэхтэһии “Кыайыы 50 сыла” успуорт комплексыгар от ыйын 3 күнүгэр диэри буолар. 100 солк. билиэти атыылаһан оонньуулары көрүөххэ уонна сөбүлүүр хамаанда туһугар “ыалдьыахха” сөп.
«Азия оҕолоро» норуоттар икки ардыларынааҕы спортивнай оонньуулар генеральнай партнерунан 1996 сылтан «АЛРОСА» АХ буолар.
Хаҥалас улууһун 1-кы Малдьаҕар нэһилиэгин олохтоохторо ааспыт өрөбүллэргэ бэлиэтэммит "Нэһилиэк күнүгэр" бэртээхэй сонуну истэн үөрдүлэр.…
Бу күннэргэ Амма улууһун баһылыга Степан Кузьмин кыстыкка киириигэ бэлэмнэнии чэрчитинэн улуус киинин хочуолунайдарын туруктарын…
Таатта Харбалааҕар Аҕа дойду Улуу сэриитигэр кыайыы 80 сыллаах үбүлүөйүн көрсө бэлэмнэнии үлэ саҕаланна. "Дьоһуннааҕы…
Бүгүн СӨ Урбааҥҥа, атыыга-эргиэҥҥэ уонна туризмҥа миниистирэ Тимур Ханды министиэристибэ үлэһиттэригэр «Туризмы сайыннарыы уонна территориальнай…
Балаҕан ыйын 14 күнүгэр "Мукучу нэһилиэгэ" МТ баһылыга Николай Иванович Левин, "Сарыал" түөлбэ салайааччыта Анна…
Нам улууһун баһылыга Юрий Слепцов анал дьаһалынан улуус социальнай-экэнэмиичэскэй сайдыытын пуондатын бырабылыанньата халаан уутуттан эмсэҕэлээбит…