Саха сирин гимнастара Казахстаҥҥа аан дойдутааҕы турнирга ситиһиилээхтик кытыннылар

Дьокуускай куорат «Либерти» уонна «Сардаана» уус-уран гимнастика  кулууптарын хамаандалара Казахстан киин куоратыгар Астанаҕа ыытыллыбыт «Grand Prix Alem» аан дойдутааҕы турнирыгар кытыннылар. Бу туһунан Саха сирин уус-уран гимнастикаҕа федерациятын пресс-сулууспата иһитиннэрэр.

Гимнастар үгүстэригэр бу бастакы аан дойдутааҕы таһымнаах сырыы буолла. Саха кыргыттара биирдиилээн уонна бөлөҕүнэн бырагыраамларга кытыннылар. Күрэхтэһиигэ Арассыыйаттан, Беларустан, Кыргызстантан уонна Казахстантан хамаандалар кыттыыны ыллылар.

«Бу сүрдээх улахан уопут, тоҕо диэтэххэ аан дойдутааҕы таһымҥа дьүүллээһин уратылаах, онон биһиги бары итэҕэстэрбитин көрөн көннөрүнэр кыахтанныбыт. Биһигини ыҥырбыт «Alem» аан дойдутааҕы гимнастика академиятын кытта биһиги кулууппутбииргэ үлэлээһин туһунан сөбүлэҥнээх. Онон инникитин кинилэр ыытар күрэхтэһиилэригэр уонна турнирдарыгар хайаан да кыттыахпыт, уопут атастаһыахпыт уонна тэрилтэлэрбит икки ардыларыгар доҕордуу сибээһи өйүөхпүт», – диэн «Либерти» кулууп тириэньэрэ Александра Бронских кэпсээтэ.

«Бастатан туран, күрэхтэһии үрдүк таһымнаахтык тэриллибитин бэлиэтиэхпин баҕарабын. Барыта кыратыттан саҕалаан ымпыктаан-чымпыктаан толкуйданыллыбыт, биһигини олус истиҥник, эйэҕэстик көрүстүлэр. Усулуобуйа табыгастаах буолан, оҕолорбут ситиһиилээхтик кытталларыгар туһалаата. Бу дьыл кинилэргэ бастакы бөдөҥ күрэхтэһиилэрэ буолар. Араас дойдуттан күүстээх гимнастары көрдүбүт, бэйэбит таһыммытын сыаналаатыбыт уонна инникитин ханнык хайысханан үлэлиэхтээхпитин быһаарынныбыт. Сыаната суох күрэхтэһии уопутун ыллыбыт. Аныгыскы күрэхтэһиилэрбит өссө эрэллээх уонна үтүө түмүктээх буолалларын туһугар өссө кыһаллан үлэлиэхпит. Барыгытыгар өйөбүлгүт уонна сыраҕыт иһин махтал!», – диэн «Сардаана» кулууп тириэньэрэ Светлана Павлова санаатын үллэһиннэ.