Саха сирин гимнастара Казахстаҥҥа уонна Таилаҥҥа аан дойду таһымнаах күрэхтэһиилэргэ кытыннылар

Саха сирин уус-уран гимнастикаҕа кулууптара Казахстаҥҥа уонна Таилаҥҥа ыытыллыбыт норуоттар икки ардыларынааҕы күрэхтэһиилэргэ ситиһиилээхтик кытыннылар. Бу туһунан өрөспүүбүлүкэтээҕи уус-уран гимнастикаҕа пресс-сулууспата иһитиннэрэр.

Дьокуускай куорат «Либерти» уонна «Сардаана» успуорка кулууптарын хамаандалара Казахстан киин куоратыгар Астанаҕа буолбут «Grand Prix Alem» норуоттар икки ардыларынааҕы турнирга кытыннылар. Саха сирин кыргыттара биирдиилээн уонна бөлөҕүнэн бырагыраамаларга Арассыыйа, Беларусь, Кыргызстан уонна Казахстан хамаандаларын кытта тэҥҥэ күрэхтэстилэр. «Бу биһиэхэ умнуллубат уопуту биэрдэ, тоҕо диэтэххэ аан дойду таһымыгар дьүүллээһин атыннык барар, онон бары итэҕэстэрбитин көрөн, көннөрүнэр кыахтанныбыт. Күрэҕи ыытар «Alem» норуоттар икки ардыларынааҕы гимнастика академиятын кытта биһиги кулууппут бииргэ үлэлэһэр сөбүлэҥнээх, онон кинилэр ыытар күрэхтэһиилэригэр уонна турнирдарыгар хайаан да кыттыахпыт, уопут атастаһыахпыт уонна тэрилтэлэрбит икки ардыларыгар доҕордуу сыһыаны өйүөхпүт», – диэн «Либерти» кулууп тириэньэрэ Александра Бронских кэпсээтэ.

«Биһигини олус сылаастык, үөрэ-көтө көрүстүлэр, усулуобуйа табыгастаах этэ. Биһиги оҕолорбутугар бу күрэхтэһиилэр быйылгы сезоҥҥа бастакы бөдөҥ түһүлгэлэрэ, үгүстэригэр – бастакы норуоттар икки ардыларынааҕы уопуттара буолла. Сыаната биллибэт күрэхтэһии уопутун ыллыбыт», – диэн «Сардаана» кулууп тириэньэрэ Светлана Павлова бэлиэтээтэ.

Оттон Таилаҥҥа «JRC Stars Rhythmic Gymnastics Championships» диэн ааттаах норуоттар икки ардыларынааҕы күрэхтэһии буолла. Онно «Либерти», «Сардаана» уонна «Кристалл» кулууптар Таиланд, Сингапур, Япония уонна Тайвань хамаандаларын кытта кытыннылар. Эдэр гимнастар Аделина Жирохова («Либерти» кулууп), Карина Захарова («Сардаана» кулууп), Айсана Данилова, Софья Игнатьева, Виктория Монгуш («Кристалл» кулууп) олус ситиһиилээхтик кытыннылар. Оҕолор сыаналаммат норуоттар икки ардыларынааҕы күрэхтэһии уопутун ыллылар, атын дойдулартан сылдьар саастыылаахтарын кытта кэпсэттилэр, доҕордостулар. Кулууптар салайааччылара, тириэньэрдэр Александра Бронских, Светлана Павлова, Таисия Макарова инники үлэҕэ кынаттаннылар.

«Турнир умнуллубат өйдөбүллэри хаалларда. Бу биһиги сезоҥҥа бастакы күрэхтэһиибит, саҥа бырагыраамаларбытын эрэ холонон көрө сылдьабыт, ол эрээри түмүкпүт үчүгэй. Элбэх туһалаах саҥа билиилэри ыллыбыт, күрэхтэһии күннэригэр атын дойдулар гимнастарын көрүдүбүт, аан дойду дьүүллээччилэрин сыанабылларынан бэйэбитин тургуттан көрдүбүт. Бу оҕолорго да, биһиэхэ, тириэньэрдэргэ да сыаналаах уопут», – диэн «Кристалл» кулууп тириэньэрэ Таисия Макарова бэлиэтээтэ. Гимнастар норуоттар икки ардыларынааҕы күрэхтэһиилэргэ кыттар кыаҕы биэрбиттэрин иһин Саха сирин уус-уран гимнастикаҕа федерациятыгар уонна «Азия оҕолоро» оонньуулар дирекциятыгар махтаналлар.

Хаартыскалар: Александра Бронских, Светлана Павлова, Таисия Макарова архыыптарыттан.