Саха Сирин хамаандата өссө икки мэтээллэннэ

Сочига доруобуйаларынан хааччахтаах дьон Арассыыйатааҕы бэстибээллэригэр Саха Сирин хамаандата өссө икки мэтээллэннэ.

Бу күннэргэ ыытыллыбыт дартс күрэхтэһиитин түмүктэрэ таҕыстылар. Манна хамаанданан оонньууга Александра Слепцова уонна Евгений Птицын састааптаах Саха Сирин хамаандата Москва уонна Орловскай уобалас кэнниттэн үһүс буолла.

Дартска биирдиилээн түмүккэ Мэҥэ Хаҥаластан төрүттээх Евгений Птицын бастыҥнар кэккэлэригэр дьоһуннук киирдэ. Кини үһүс үктэлгэ тахсыбыт Денис Рябовы (Москва) 81 очукуонан кэннигэр хаалларан, эрэллээхтик үрүҥ көмүс мэтээли ылла. Былырыыҥҥы бэстибээлгэ Евгений Птицын 428 очукуоланан төрдүс буолбута. Ити көрдөрүүтүн кини бу бэстибээлгэ 503-кэ тиэрдэн лаппа тупсарда. Онон сыл устата утумнаахтык дьарыктаммытын арылхайдык мэктиэлээтэ. Бу сырыыга кини чөмпүйүөн буолбут Денис Фоминтан (Москва) алта эрэ очукуонан быысаһан, үрүҥ көмүс призер буолла. Иллэрээ сыл Евгений Птицын СӨ Ил Дарханын Гранын ылан, дойдутугар успуорт бу көрүҥэ сайдарыгар болҕомтотун туһаайбыта.

Маны сэргэ, түргэн саахымакка Егор Федоров сэттэтэ оонньоон биэс кыайыылаах. Түмүк бүгүн биллиэҕэ.

Альбина Тарабукина.

Хаартыскалар ааптар тиксэриилэрэ.