Саха сирин хамаандата Сочига түүҥҥү хоккей лигатыгар миэстэлэстэ

«Якутскэнерго» хамаандата Сочига түүҥҥү хоккей лигатын бэстибээлин боруонса призера буолла. Кинилэр 50-тэн аҕа саастаахтар дивизионнарыгар дьоҕус кубокка оонньоотулар. 

Константин Фаткулов салайааччылаах хамаанда биэс түһүмэххэ оонньоото, түөрт түһүмэҕи кыайда. Хоккеистар финалга тахсар иһин киирсиигэ Владимир куораттан сылдьар хамаандаҕа 5:6 ахсаанынан хоттордулар.

Үһүс миэстэни былдьаһыыга Саха дьоно Брянскайтан «Партизан» хамаанда утары оонньоотулар уонна 4:0 ахсаанынан кыайаннар бэстибээл түүҥҥү хоккей лигатын боруонса мэтээлин ыллылар. Бу дивизиоҥҥа барыта 20 хамаанда кытынна.