Саха сирин хамаандатыгар Роман Николаев иккис кыһыл көмүс мэтээли аҕалла

Роман Дмитриев аатынан көҥүл тустууга норуоттар икки ардыларынааҕы күрэхтэһии финалыгар Роман Николаев Саха сирин сүүмэрдэммит хамаандатыгар иккис кыһыл көмүс мэтээли ылары ситистэ.

Маны таһынан өрөспүүбүлүкэ үс  спортсмена Саха сирин хамаандатыгар үс боруонса наҕараадалары ыллылар. Турнир финалыгар көҥүл тустууга чөмпүйүөн Роман Николаев  79 киилэҕэ диэри ыйааһыҥҥа Ставропольскай кыраай бэрэстэбиитэлин Абдусалим Абдусилимовы кытта киирсэн, 12:0 ахсаанынан эрэллээхтик кыайыылаах таҕыста. Бу туһунан «Триумф» успуорт уораҕайын пресс-сулууспата биллэрдэ.

Өссө финалга Саха сирин тустууктара боруонса мэтээллэри ыллылар. Кирилл Мордовской 9:0 ахсаанынан Бурятияттан Батор Цыденжаповы кыайда уонна боруонса мэтээли ылары ситистэ. Бу иннинэ Николай Щеглов Тываттан Арсен Дооржугу 7:0 ахсаанынан үһүс миэстэҕэ кыайыылаах тахсан, Саха сирин хамаандатыгар бастакы боруонса мэтээли ылбыта.