Саха сирин икки оройуонугар ардах уутуттан үрдүк бэлэмнээх буолуу эрэсиимин киллэрдилэр

Үөһээ Халыма уонна Орто Халыма улуустарыгар ардах уутуттан үрдүк бэлэмнээх буолуу эрэсиимэ биллэрилиннэ диэн Гражданскай оборуона дьыалаларыгар уонна нэһилиэнньэ олоҕор-дьаһаҕар куттала суох буолуутун хааччыйыы министиэристибэтэ иһитиннэрэр.

Дьокуускайдааҕы гидрометеокиин иһитиннэриитинэн,  Халыма өрүс Зырянка-Халыма учаастагар сууккаҕа 14-тэн 56 см диэри уу таһыма үрдүүрэ бэлиэтэнэр. Зырянкаҕа аэропортка көтөр-түһэр балаһаны уу ылла. Чэппиэргэ, балаҕан ыйын 12 күнүгэр, авиариэйстэри тохтоттулар. Аэропортка Ан- 24 уонна Ан- 26 салгын суудуналара түһэр кыаҕа суох.  Миниистири эбээһинэһин толорооччу Айаал Вензель иһитиннэрбитинэн, нэһилиэнньэлээх пууннарга уу киирбэтэх. Олох-дьаһах уонна социальнай эбийиэктэр штатнай эрэсииминэн үлэлииллэр.