Саха сирин икки оскуолата дойду 100 бастыҥ оскуолатын ахсааныгар киирбит

RAEX ааҕыныстыба 2024 сылга Арассыыйа оскуолаларын эриэйтинин таһаарбыт.  Саха сирин икки оскуолата 100 бастыҥ оскуолатын ахсааныгар киирбит. Ханнык оскуолалар? 

Ол курдук, куонкурустаһар кыахтааҕынан эриэйтиннэһэр кыахтаах 300 оскуола кэккэтигэр 82-с нүөмэринэн В.П.Ларионов аатынан физика-тиэхиньикэ лиссиэйэ, 89-с нүөмэринэн Н.А.Алексеева аатынан тиэхиньиичэскэй лиссиэй, 110-с нүөмэринэн Өрөспүүбүлүкэтээҕи лиссиэй-интэринээт сылдьаллар. Саха сирин атын оскуолалара тустаах испииһэккэ көстүбэттэр.

Инники күөҥҥэ сылдьар (ведущие вузы) үрдүк үөрэх кыһатыгар киирбит оҕотун ахсаанынан эриэйтиҥҥэ Өрөспүүбүлүкэтээҕи лиссиэй-интэринээт 64-с миэстэҕэ сылдьар. Оскуоланы бүтэрээччитин 64,7% бүддьүөккэ, 19,1 % төлөөн киирбит, 16,2 % олимпиадаҕа кыттыбыт.

В.П.Ларионов аатынан физика-тиэхиньикэ лииссиэйэ 316-с нүөмэринэн турар. Бүддьүөккэ 48,3%, 34,8% төлөбүрдээххэ киирбиттэр, 16,9% олимпиадаҕа кыттыбыт.