Саха сирин икки үрдүк үөрэх кыһатыгар волонтер хамсааһынын сайыннарар киин арыллыаҕа

“Добро.Центр” уопсастыбаннай сайдыы кииннэрэ АГИКИ уонна Чурапчытааҕы физическэй култуура уонна успуорт судаарыстыбаннай институтун баазатыгар тэриллиэхтэрэ.

Бу туһунан ыччат миниистирэ Петр Шамаев иһитиннэрдэ. “Саха сирин баһылыга Айсен Николаев ыччаты гражданственность, дойдумсах буолуу тыыныгар иитиини күүһүрдэр наадатын бэлиэтээбитэ. Быйыл Саха сирин үрдүк үөрэҕин икки кыһатыгар –  култуура уонна искусство Арктикатааҕы институтун уонна Чурапчытааҕы физическэй култуура уонна успуорт судаарыстыбаннай институтун баазаларыгар “Добро. Центр” уопсастыбаннай сайдыы кииннэрэ арыллыаҕа”, — диэтэ Петр Шамаев.

АГИКИ бастакы проректора – ыччат бэлиитикэтигэр проректора Станислав Иванов бэлиэтээбитинэн, социальнай франшиза туһунан лиссиэнсийэ дуогабара 2022 сыл ахсынньытыгар Арассыыйа волонтердарын киинин ассоциациятынан илии баттаммыт. “АГИКИ “Добро. Центр” сүрүн соругунан устудьуон саҥа көлүөнэ лиидэрдэрин иитии буолар. Киин култуура уонна креативнай индустрия эйгэтигэр тутаах буолуоҕа”, — диэн Станислав Иванов бэлиэтээтэ.

Аан бастаан “Добро. Центр” Мииринэй оройуонугар Удачнай куорат эбии үөрэхтээһиҥҥэ киинин баазатыгар арыллыбыта.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата