Ил Дархан Айсен Николаев Идэлээх сойуустар үлэһиттэрин күнүнэн эҕэрдэлиир

Ытыктабыллаах актыбыыстар, идэлэх сойуустар хамсааһыннарын бэтэрээннэрэ уонна лиидэрдэрэ!

Саха Өрөспүүбүлүкэтин салалтатын уонна тус бэйэм ааппыттан эһигини өрөспүүбүлүкэҕэ Идэлээх сойуустар үлэһиттэрин күнүнэн эҕэрдэлиибин!

Бүгүн өрөспүүбүлүкэҕэ Идэлээх сойуустар федерациялара бэйэтин кэккэтигэр 168 тыһыынчаттан тахса Саха сирин олохтооҕун түмэр уонна кинилэр бырааптарын, интэриэстэрин араҥаччылыыр, сөптөөх хамнаһы, үлэ миэстэтигэр куттал суох буолуутун уонна үлэ миэстэлэрин, социальнай өттүнэн сиэрдээх буолууну уонна былаас, үлэни биэрээччилэр уона үлэ кэлэптииптэрин икки ардыларыгар партнердуу сыһыаны олохтооһуну хааччыйыыга төһүү буолар.

Өрөспүүбүлүкэ идэлээх сойуустара инники кирбиигэ сылдьар байыастарга, байыаннай дьайыы бэтэрээннэригэр, байыаннай сулууспалаахтар дьиэ кэргэттэригэр уонна үлэһиттэргэ көмөлөһөр. Гражданнар бырааптарын көмүскээһиҥҥэ, ыччаты уонна дьахталлары өйөөһүҥҥэ, успуорт уонна култуура хайысхалара сайдыыларыгар, социальнай уонна иһитиннэрэр бэлиитикэҕэ эһиги тиһиктээх үлэҕит дириҥ ытыктабылынан ахтыллар.

Ааспыт уон сыллар биһиги дойдубут устуоруйатыгар бүтүн эпоханан буоллулар. Кинилэр киэҥ хабааннаах уларыйыы, саҥа ыҥырыылар уонна уустук тургутуулар кэмнэрэ этилэр. Бу усулуобуйаларга идэлээх сойуустар бэйэлэрин историческай нэһилиэстибэлэрин илдьэ сылдьары таһынан мунньуллубут уопуттарын хаҥаттылар, гражданскай уопсастыба институтун, үлэ киһитин көмүскээһин дьыалатыгар судаарыстыба бигэ тирэҕин быһыытынан бэйэлэрин суолталарын дакаастаатылар.

Идэлээх сойуус хамсааһынын устуоруйата – бу үгэстэргэ, көлүөнэлэр солбуһууларыгар, түмсүүгэ уонна сомоҕолоһууга эрэнии устуоруйата. Бүгүн уруккутун курдук, идэлээх сойуустар социальнай туруктаах буолууга, уопсастыбаҕа или-эйэни бөҕөргөтүүгэ, үлэ дьонун олоҕун-дьаһаҕын хаачыстыбатын үрдэтиигэ сүҥкэн кылааттарын киллэрэллэр.

Эһиги ыытар үлэҕит киэҥ хайысхалаах. Саха Өрөспүүбүлүкэтин Идэлээх сойууһун федерациятыгар Босхо юридическай күҥҥэ 180 тахса киһи сүбэни ылла. Идэлээх сойуус ыччатын нэдиэлэтэ 60 тахса эдэр идэлээх сойуус актыбыыһын түмтэ. Федерация салаа тэрилтэлэрин идэлээх сойууһун үлэтин настаабынньыктарын кытта көрсүһүүлэр, “Көдьүүстээх бастакы сүһүөх идэлээх сойуус тэрилтэтэ”сэминээр-мунньах, дьыктаан уонна Кыайыы 80 сылыгар субуотунньук, “Профстарт-2025” ыччат пуорума, “Үлэ киһитэ” фотокуонкурус, саха норуотуттан бастакы Сэбиэскэй Сойуус Дьоруойа Федор Кузьмич Попов чиэһигэр  “Дьоруой суола”  спортивнай-патриотическай марафон, Үлэ Куубагын күрэхтэһиилэрэ – бу уонна да атын тэрээһиннэр эһиги олоххутун көхтөөх оҥороллор.

Үс тыһыынчаттан тахса Саха сирин эдэр олохтооҕо саҥа үөрэх дьылын саҕаланыытыгар көмө ылла, байыаннай дьайыы кыттыылаахтарын уонна кинилэр дьиэ кэргэттэрин өйөөһүн салҕанар.

Бу бырааһынньык күн бэтэрээннэргэ, лиидэрдэргэ уонна үлэһиттэргэ көхтөөх үлэҕит, үлэһиттэр бырааптарын көмүскээһин дьыалатыгар уонна өрөспүүбүлүкэ уонна дойду сайдыытыгар киллэрэр дьоһун кылааккыт иһин махтанабын.

Эһиэхэ чэгиэн доруобуйаны, сомоҕолоһууну, сарсыҥҥы күҥҥэ эрэли уонна үлэ киһитин туһугар саҥа ситиһиилэри баҕарабын!

Айсен Николаев, Саха Өрөспүүбүлүкэтин Ил Дархана