Саха сирин киберспортсменнара Кытай хамаандатын кыайдылар

HOTU хамаанда Counter-Strike 2 оонньууга Astana 2025 чөмпүйэнээтин иннинэ ыытыллыбыт азиатскай квалификация кыайыылааҕынан буолла. Финалга Саха сирин спортсменнара JiJieHao диэн Кытай хамаандатын 3:0 ахсааҥҥа кыайдылар.

Бу туһунан Ил Дархан уонна Бырабыыталыстыба дьаһалтатын пресс-сулууспата иһитиннэрэр.

Хамаанданы кыайыытынан Ил Дархан Айсен Николаев эҕэрдэлээтэ: «Бу көннөрү кыайыы эрэ буолбатах. Бу өр сыллаах үлэ, бэлэмнэнии, баҕа санааҕа итэҕэйии иһин үрдүкү наҕараада буолар. HOTU спортсменнара  эрэллээхтик сабыылаах квалификациялары ааһан, үрдүк таһымнаахтарын көрдөрдө. Бу Саха сирин киберспордун саҥа түһүмэҕинэн буолар».