«Саха сирин киэн туттуута» бириэмийэ түмүгүн таһаардылар

Ахсынньы 9 күнүгэр “Саха сирин киэн туттуута” норуот бириэмийэтин сыллааҕы түмүгүн таһаардылар. Финалистары уонна кыайыылаахтары наҕараадалааһын Бырабыыталыстыба дьиэтигэр уонна онлайн-көрүҥүнэн тэҥинэн буолла. Улуустарга олорор, кыайан кэлбэтэх кыттааччылар онлайн көрҥүнүнэн холбоннулар.

Быйыл 10 номинация баара. Ый аайы кэриэтэ өрөспүүбүлүкэ бүттүүнэ биир номинацияҕа куоластаан, кыайыылааҕы быһаарбыта. “Саха сирин киэн туттуута” бириэмийэҕэ, аата да этэрин курдук, олорор сирин сайыннарыыга элбэҕи оҥорбут, ситиспит, чахчы да, дьон киэн туттар киһитэ кыттар.

Быйылгы сыл кыайыылаахтара: «Землеустроитель» номинация (кыайыылаах Марфа Лыткина), «Норуот уус-уран оҥоһугун маастара» (кыайыылаах Александр Шадрин), «Сибээс эйгэтин үлэһитэ» (кыайыылаах Владислав Неустроев), «Элбэх оҕолоох ийэ-учуутал» (кыайыылаах Нюргуяна Винокурова), «Баһаары утары охсуһар судаарыстыбаннай сулууспа үлэһитэ” (кыайыылаах Михаил Михайлов), «МФЦ универсальнай исписэлииһэ» (кыайыылаах Нарыйа Павлова), «Ветеринарнай быраас» (кыайыылаах Павел Слепцов), «Саха сирин шахтёра» (кыайыылаах Валярий Мярин), «Норуот дипломата» (кыайыылаах Мария Шишигина-Палссон), «СӨ муниципальнай тэриллиигэ бастыҥ архитектора» (кыайыылаах Семен Сергеев).

Каыйыылаахтары “Сахамедиа” холдинг генеральнай дириэктэрэ Виктор Колесов эҕэрдэлээтэ.

— Биһиги бүгүн пандемия кэнниттэн аан бастаан муһуннубут. Бу кэнники сылларга онлайн көрүҥүнэн ыытыллан кэллэ, ол да үрдүнэн, бырайыак үлэтэ быстыбатаҕа. Быйыл “Саха сирин киэн туттуута” бырайыак олус чаҕылхай буолла. Хас сыл, ый аайы араас идэлээх дьону таһаарабыт, кинилэр үлэлэрин сырдатабыт. Киһи идэтигэр бэриниилээх, үлэтин таптыыр, үүнэр-сайдар, инникигэ хардыылыыр  буоллаҕына, экэниэмикэ сайдыытыгар төрүөт буоларын дьоҥҥо өйдөтөбүт. Бары кыттааччылары уонна кыайыылаахтары эҕэрдэлиибин! – диэн кини бэлиэтээтэ.

Чахчыта, бу бириэмийэҕэ кыттааччы да буоллахха, кыайыылаах курдук буолаҕын. Тоҕо диэтэххэ, өр сыллаах сыралаах үлэҥ бэлиэтэнэр, дьоҥҥо киэҥник сырдатыллар.

2022 сылга кыттааччыларга барыта 526 416 куолас киирбит, 992 115 киһи куоластаабыт. “Элбэх оҕолоох ийэ-учуутал” номинацияҕа барыта 148 557 куолас киирэн, рекорд олохтоммут.

“Саха сирин киэн туттуута” норуот бириэмийэтэ 2017 сыллаахха олохтоммута. Күн бүгүҥҥэ диэри “Сахамедиа” холдинг тэрийэн ыытар. Бырайыак сүрүн соруга – үтүө түмүктээх, көдьүүстээх, айымньылаах үлэҕэ уопсастыбаннас болҕомтотун тардыы, экэниэмикэ араас салааларыгар айа-тута, үлэлии-хамсыы, өрөспүүбүлүкэ сайдыытыгар бэйэлэрин кылааттарын киллэрэ сылдьар, идэлэригэр бэриниилээх үлэһиттэр үтүө холобурдарын, ситиһиилэрин сырдатыы, өссө үрдүккэ көҕүлээһин буолар.

Хаартыска: СИА.